दुधौली एफ.एम. सम्वाददाता
सिन्धुली / सिन्धुलीको दुधौली नगरपालिका–४ पाखाभित्तामा चट्याङ लागेर एक वृद्धको मृत्यु भएको छ।मृत्यु हुनेमा स्थानीय ७० वर्षीय पूर्णबहादुर बुढाथोकी रहेका छन्। अविरल वर्षासँगै परेको चट्याङका कारण उनी गम्भीर घाइते भएका थिए।
प्रहरीका अनुसार बुढाथोकी घरदेखि करिब २०० मिटर दक्षिणतर्फ रहेको मकैबारीमा घाँस काट्न गएका थिए। राति अबेरसम्म पनि घर नफर्किएपछि आफन्तले खोजतलास सुरु गरेका थिए। खोजी गर्ने क्रममा राति करिब ९ः४५ बजे उनी खेतमा घाइते भई ढलिरहेको अवस्थामा फेला परेका थिए।
अचेत अवस्थामा रहेका बुढाथोकीलाई स्थानीयवासीले राति १० बजे इलाका प्रहरी कार्यालय डकाहामा खबर गरेका थिए। जानकारी प्राप्त हुनासाथ प्रहरी निरीक्षक सपना खड्काको कमाण्डमा प्रहरी टोली घटनास्थलतर्फ खटिएको थियो।
घाइते बुढाथोकीलाई तत्काल उपचारका लागि नगर अस्पताल सिर्थौली लगिएको थियो। तर उपचारकै क्रममा चिकित्सकले राति १०ः५० बजे उनलाई मृत घोषणा गरेको जिल्ला प्रहरी कार्यालय सिन्धुलीले जनाएको छ।
घटनाबारे प्रहरीले आवश्यक अनुसन्धान गरिरहेको जनाएको छ। तस्बिर: AI
