सिन्धुली, पुष २३
दुधौली नगरपालिकामा रहेका टोल सुधार संस्थाहरूको क्षमता अभिवृद्धि गर्न नगरपालिकाले एकदिने अभिमुखीकरण कार्यक्रम सम्पन्न गरेको छ। नगरपालिकाको सभा हलमा आयोजित कार्यक्रम पुष २३ गते बिहान ११:०० बजे सुरु भएको हो।
कार्यक्रमका प्रमुख अतिथि नगर प्रमुख दिनेश अधिकारी रहेका थिए भने प्रशासकीय प्रमुख श्दिनेश पन्थ तथा वातावरण प्रमुख नारायणप्रसाद भट्टराई कार्यक्रमका अन्य विशिष्ट अतिथि थिए। कार्यक्रममा १४ वटै वडाबाट आएका टोल सुधार संस्थाका प्रतिनिधिहरूको उपस्थिति रहेको थियो।
कार्यक्रम सञ्चालन गर्दै वातावरण प्रमुख भट्टराईले समुदायस्तरको सुधारमा टोल सुधार संस्थाहरूको योगदानको चर्चा गर्दै, बढ्दो वातावरणीय प्रदूषणलाई ध्यानमा राखी नगरक्षेत्रको खाली जग्गा, भिर पाखा, र सडक किनारमा फलफूलका बोट बिरुवा रोप्ने प्रस्ताव अघि सारे। उनले उपभोक्ताले माग गरेअनुसार नगरपालिकाले बिरुवा उपलब्ध गराउने पनि जानकारी दिए।
नगर प्रमुख दिनेश अधिकारीले स्थानीय विकासमा टोल सुधार संस्थाहरूको भूमिका महत्वपूर्ण रहेको बताए। उनले संस्थाहरूसँग सहकार्य गर्दै नगरपालिका स्तरमै यस्ता कार्यक्रमलाई निरन्तरता दिने प्रतिबद्धता जनाए।कार्यक्रममा सहभागी प्रतिनिधिहरूले तालिम उपयोगी रहेको प्रतिक्रिया दिएका छन्।
कार्यक्रमको समापन गर्दै वडा नं. ६ का टोल सुधार संस्था ‘भत्ताही टोल सुधार संस्था’का अध्यक्ष युबराज भण्डारीले सम्पूर्ण सहभागीहरू, नगरपालिका, र सबै वडाध्यक्षहरूलाई धन्यवाद ज्ञापन गर्दै आगामी दिनमा वातावरण संरक्षणका लागि सामूहिक प्रयास आवश्यक रहेको बताए।
