दुधौली / बागमती प्रदेश सरकारले आर्थिक वर्ष २०८२/०८३ का लागि दुधौली नगरपालिका–९ र १० अन्तर्गत पर्ने दुधौली–खिरियानी–पतियानी हुँदै कर्था कोगटीसम्म जोडिने मदन भण्डारी राजमार्ग जोड्ने सडक स्तरोन्नतिका लागि बजेट सुनिश्चित गरेको छ।
उक्त सडक पिच तथा स्तरोन्नतिका लागि सुरुमा १ करोड ३५ लाख रुपैयाँ विनियोजन गरिएको थियो। तर, सरकारी नीतिअनुसार ३० प्रतिशत बजेट कटौती भएपछि रकम घटेर ९४ लाख ५० हजारमा सीमित भएको थियो। यसबीच पहलपछि सो योजना बहुवर्षीय स्रोत सुनिश्चिततामा समावेश भई कुल बजेट १ करोड ८९ लाख रुपैयाँ पुगेको छ।
पूर्व मन्त्री सुकुमाया तामाङको नेतृत्वमा बागमती प्रदेश सांसद मातृका भट्टराई ‘वसन्त’ सहित विभिन्न नेताहरूको संयुक्त टोली मन्त्रालय पुगेको थियो। टोलीले सक्रिय पहल गरेपछि योजना स्रोत सुनिश्चित गर्न सफल भएको हो।
स्थानीय तहका जनप्रतिनिधि तथा सरोकारवालाहरूका अनुसार अब छिट्टै सडक स्तरोन्नतिका लागि ठेक्का प्रक्रिया अघि बढाइनेछ। यस सडक निर्माणले दुधौली क्षेत्रको यातायात सहज हुनुका साथै स्थानीय आर्थिक गतिविधिमा समेत सकारात्मक प्रभाव पर्ने अपेक्षा गरिएको छ।
