दुधौली एफएम सम्बाददाता
दुधौली / दुधौलीमा आज सम्पन्न भएको खुल्ला नकाउट दुधौली क्रिकेट २०८२को उपाधि सिन्धुली क्रिकेट क्लबले उचालेका छन । आज सम्पन्न भएको रोमाञ्चक तथा प्रतिस्पर्धात्मक फाइनल खेलमा सिन्धुली क्रिकेट क्लबले दुधौली क्रिकेट क्लब (A) लाई ४ विकेटले पराजित गर्दै उपाधि आफ्नो पक्षमा पार्न सफल भएको हो । टस जितेर पहिले ब्याटिङ गरेको घरेलु टिम दुधौली क्रिकेट क्लब (A) ले निर्धारित २० ओभरमा १ सय ६१ रन बनाएर अलआउट भएको थियो।
घरेलु टिमका लागि मिलन विश्वकर्माले ३२ बलमा ५० रनको आकर्षक अर्धशतक प्रहार गरे भने आकाश सेवाले २५ बलमा ३८ रन जोड्न सफल भएका थिए । मुकेश साहले १० बलमा २१ रनको योगदान दिए।
सिन्धुली क्रिकेट क्लबका तर्फबाट विनय यादवले प्रभावकारी बलिङ गर्दै महत्वपूर्ण ३ विकेट लिए। त्यस्तै उसन पौडेल र सुभासले समान १–१ विकेट हात पारे। १ सय ६२ रनको लक्ष्य पछ्याउँदै मैदानमा उत्रिएको सिन्धुली क्रिकेट क्लबले सुरुवाती चरण खासै उत्कृष्ट नभए पनि पावर ओरको समाप्ति पछि भने आक्रामक रूपमा प्रस्तुत भएको थियो । घरेलु छिमले दिएको लक्षलाई पछ्याउदै रणनीतिक रूपमा १९.३ ओभरमै ६ विकेटको क्षतिमा १ सय ६४ रन जोड्दै दुधौली क्रिकेट कपको पहिलो उपाधि हात पार्न सफल भएको हो ।
टिमका लागि विनय यादवले ३० बलमा अविजित ५८ रन प्रहार गर्दै विजयी पारी खेल्दा राजु महराले ३५ बलमा ५४ रन जोड्न सफल भयो भने सुभम सिंहले १३ बलमा १० रन बनाएका थिए। बलिङतर्फ दुधौली क्रिकेट क्लबका राघव यादवले ४ ओभरमा २ विकेट लिएको थियो । यसैगरी क्याप्टेन दिपेन्द्र महतोले २ ओभरमा २ विकेट हात पार्न सफल भए भने सुबन श्रेष्ठले १ विकेट लिएका थिए ।
आज भएको उत्कृष्ट प्रदर्शनका सिन्धुलीका आधारमा विनय यादवलाई म्यान अफ द म्याच घोषित गरिएको छ । फाइनल खेलपश्चात् आयोजित पुरस्कार वितरण कार्यक्रममा दुधौली नगरपालिकाका कार्यवाहक नगर प्रमुख चन्द्र किशोर थारूले विजेता र उप–विजेता टिमलाई पुरस्कार प्रदान गर्नुभयो।
विजेता सिन्धुली क्रिकेट क्लबले नगद रु ५० हजार नगद सहित सिल्ड, ट्रफि तथा प्रमाणपत्र प्राप्त गरेको छ भने उप–विजेता दुधौली क्रिकेट क्लब (A) ले नगद रु २५ हजार नगद सिल्ड, ट्रफि तथा प्रमाणपत्र प्राप्त गरेको छ । दुधौलीमा सम्पन्न आजको फाइनलले स्थानीय खेलकुद विकासमा सकारात्मक ऊर्जा थपेको खेल प्रेमीहरूले बताएका छन् ।
मंसिर ८ गते देखि सुरू भएको क्रिकेट कपमा जम्मा ८ टिमको प्रतिपर्धा रहेको तियो ।
