सिन्धुलीको दुधौलीमा सवारी दुर्घटना ४ घाईते, एक जनाको अवस्था गन्भिर
गुनामाया मगर
सिन्धुली, २०८२ जेठ २८ – सिन्धुली जिल्लाको दुधौली नगरपालिका–३ स्थित कमला पुल नजिकै आज बिहान करिब ७:०० बजे भएको सवारी दुर्घटनामा चार जना घाइते भएका छन् । मदन भण्डारी राजमार्गमा भिमानबाट डकाहा तर्फ जाँदै गरेको ना ८ ख ७७३९ नम्बरको टिपरले घाँस काट्न हिँडेका पैदल यात्रीहरूलाई ठक्कर दिएको छ । त्यसपछि सोही टिपरले विपरीत दिशाबाट आइरहेको प्रदेश ३–०१–०२२ च ८२८२ नम्बरको कारलाई समेत ठक्कर दिएको जिल्ला प्रहरी कार्यालय सिन्धुलीए जनाएको छ ।
दुर्घटनामा सिन्धुली दुधौली नपा–३ झुङ्गा निवासी करिब ४५ वर्षीय कृष्ण बहादुर कटुवाल गम्भीर घाइते भएका छन् । टाउकोमा चोट लागेको र बोल्न नसक्ने अवस्थामा उनी रहेको जनाइएको छ । त्यस्तै, पैदलयात्री मिनमाया कटुवालको टाउको, छाती र बायाँ खुट्टामा चोट लागेको छ । उनको अवस्था मध्यम रहेको छ ।
कार चालक मोरङ, विराटनगर–३ निवासी करिब ४५ वर्षीय प्रमोद रेग्मीको दायाँ गाला र छातीमा चोट लागेको छ भने कारमै सवार तुलसा निरौलाको टाउको, छाती र ढाडमा चोट लागेको जनाइएको छ । दुबैको अवस्था मध्यम रहेको र बोल्न सक्ने अवस्थामा रहेको प्रहरी स्रोतले जनाएको छ ।
घाइतेहरूलाई तत्कालै उपचारका लागि जनसेवा अस्पताल बर्दिवास पठाइएको छ । दुर्घटनाको जानकारी पाएपछि इलाका प्रहरी कार्यालय डकाहाबाट प्रहरी निरीक्षक सिमोन धितालको कमाण्डमा र हत्पते प्रहरी चौकीबाट प्रहरी सहायक निरीक्षक शंकर कटुवाल सहितको टोली घटनास्थल पुगेको थियो । टोलीले टिपरलाई नियन्त्रणमा लिई इलाका प्रहरी कार्यालय डकाहा ल्याइरहेको छ भने कार निकाल्ने कार्य भइरहेको बताइएको छ । दुर्घटनापछि टिपर चालक फरार भएको र खोजी कार्य भइरहेको जिल्ला प्रहरी कार्यालय सिन्धुलीले जनाएको छ ।
