दुधौली। दुधौली नगरपालिका वडा नम्बर ७ मा सञ्चालन भएका विभिन्न पूर्वाधार विकास योजनाको बृहत अनुगमन सम्पन्न भएको छ। अनुगमन दुधौली नगरपालिकाका कार्यवाहक नगरप्रमुख चन्द्र किशोर संयोजकत्वमा भएको थियो ।। सो टोलीमा वडा नम्बर ७ का वडा अध्यक्ष रजन दाहाल, निमित्त प्रमुख प्रशासकीय अधिकृत सुबोध निरौला, योजना शाखाका प्रमुख तथा विभिन्न शाखाका प्रतिनिधिहरूको सक्रिय सहभागिता रहेको थियो।
अनुगमन अन्तर्गत च्यान डाँडा बाटो ढलान ७० मिटर, सिङ्ग राई घर अगाडि ८८ मिटर, ठूली गैरीमा ८ सय मिटर पक्की कुलो निर्माण, सुगारे स्कुल छेउको १५० मिटर नाली निर्माण तथा ग्राभेल, सुगारे डाँडा बाटो ढलान ४० मिटर र सिमले टोलदेखि सुगारे हुँदै बटाह जोड्ने करिब १ किलोमीटर नयाँ सडक कटिङ जस्ता महत्वपूर्ण कार्य सम्पन्न भएको जनाइएको छ। साथै नदी नियन्त्रणका लागि १ सय १० घन मिटर ग्याबियन जाली जडान गरिएको छ।
यस परियोजनाका लागि ३६ लाख रुपैयाँ वडाबाट छुटाइएको भए पनि स्थानिय उपभोक्ताहरुको सकृयताका कारण ४१ लाख बराबरको कार्य भएको अनुगमन समितिले जनाएको छ। समितिका अध्यक्ष राजेन्द्र थापाले योजनाहरू समयमै र गुणस्तरयुक्त रूपमा सम्पन्न भएको भन्दै स्थानीय सरोकारवालाको निरन्तर सुझाव र सहकार्य अझै आवश्यक रहेको धारणा राखेका छन्।
