दुधौली एफ.एम. सम्वाददाता
दुधौली, सिन्धुली – नेकपा (माओवादी केन्द्र) दुधौली नगर कमिटिको दोस्रो नगर सम्मेलन भव्य रूपमा सम्पन्न भएको छ। संगठन सुदृढीकरण, राजनीतिक कार्यदिशा निर्धारण र आगामी रणनीतिलाई स्पष्ट पार्ने उद्देश्यले आयोजित सम्मेलनले नयाँ नेतृत्व चयन गर्दै उत्साहजनक सहभागिता र रचनात्मक छलफलका बीच ऐतिहासिक उपलब्धि हासिल गरेको छ।
सम्मेलनबाट अर्जुन कार्की सर्वसम्मत रूपमा नगर समिति अध्यक्षमा निर्वाचित हुनुभएको छ। उपाध्यक्ष पदमा सम्झना अधिकारी, रामशरण थापा र बद्रिकुमार दाहाल निर्वाचित हुनु भएको छ भने सचिवमा ठकुराम थापा मगर र सहसचिवमा युवराज अधिकारी चयन हुनु भएको छ। त्यस्तै, कोषाध्यक्षको जिम्मेवारी तेजु पाख्रिनलाई दिइएको छ।
दुधौली नगरपालिकाका सबै १४ वटै वडाबाट प्रतिनिधित्व गर्दै सम्पन्न सम्मेलनमा पार्टीका विभिन्न तहका नेताहरू, कार्यकर्ता, शुभेच्छुक र स्थानीय जनसमुदायको उल्लेखनीय उपस्थिति रहेको थियो। सम्मेलन केही ढिलो भए पनि नगरका सम्पूर्ण माओवादी कार्यकर्ताहरूको जनभावनाअनुसार समावेशी र लोकतान्त्रिक प्रक्रियाबाट सम्पन्न भएको निर्वाचन मण्डलले जनाएको छ।
नवगठित नगर कमिटि मार्फत पार्टीलाई अझ सशक्त, जनमुखी र संगठनात्मक रूपमा बलियो बनाउने दृढ संकल्प गरिएको छ। सम्मेलनले पार्टीलाई स्थानीयस्तरमा नयाँ ऊर्जा र दिशा प्रदान गर्ने अपेक्षा गरिएको छ।
