दुधौली नगर अस्पताल सिथौलीमा देखिएको बिरामीको घट्दो संख्या कुनै आकस्मिक घटना होइन, यो दीर्घकालीन बेथिति, कमजोर नेतृत्व र गैर–जिम्मेवार व्यवस्थापनको प्रत्यक्ष परिणाम हो । रोग घटेर अस्पताल रित्तिएको होइन, सेवाप्रति विश्वास मरेर अस्पताल सुनसान बनेको हो— यो कटु सत्य अब ढाकछोप गर्न मिल्दैन ।
कहिले दैनिक २ सयदेखि ४ सयसम्म बिरामी उपचार गर्ने सिथौली अस्पताल आज एक सय बिरामी पुर्याउन संघर्षरत छ । यदि यो अवस्था पनि ‘सामान्य’ ठानिन्छ भने भोलि अस्पताल बन्द हुँदा पनि अचम्म मान्नुपर्ने छैन ।
अस्पताल कि आन्तरिक युद्धको मैदान ?
सिथौली अस्पताल आज उपचार केन्द्रभन्दा बढी आन्तरिक द्वन्द्वको अखडा बनेको छ । सञ्चालक समिति, प्रशासन, चिकित्सक र कर्मचारीबीचको शक्ति संघर्ष र असमझदारीले अस्पतालको मुटु नै थला परेको छ । नेतृत्व अस्पष्ट हुँदा आदेश मानिन्न, अनुगमन नहुँदा मनपरी चल्छ र अन्ततः यसको मूल्य जनताले चुकाउँछन् ।
प्रश्न स्पष्ट छ— जनताको अस्पतालमा व्यक्तिगत अहंकारको राजनीति कहिलेसम्म ?
बीमा छ, भवन छ, उपकरण छ— तर सेवा छैन
दुधौली नगरपालिका र वडा कार्यालयले हजारौँ नागरिकको स्वास्थ्य बीमा गरिदिएका छन् । आधुनिक भवन र केही उपकरण पनि छन् । तर बिरामी अस्पताल पस्न चाहँदैनन् । कारण एउटै छ—
सेवा नपाइने ठाउँमा सुविधा हुनुको अर्थ हुँदैन ।
बीमा कार्ड बोकेर उदयपुर र बर्दिबासतर्फ धाउने नागरिकको लर्को सिथौली अस्पतालका लागि लज्जाको विषय होइन र ?
व्यवहारको रोग, औषधिले निको हुँदैन
अस्पतालको सबैभन्दा गम्भीर रोग उपकरणको कमी होइन, व्यवहारको पतन हो । केही कर्मचारी र चिकित्सकको उपेक्षापूर्ण, गैर–जिम्मेवार र अहंकारी व्यवहारले सेवाग्राहीलाई अस्पतालबाट धकेलिरहेको छ ।
सेवाग्राही उपचार खोज्दै आउँछन्, अपमान बोकेर फर्किन्छन् । यस्तो अस्पताल कसको लागि हो ?
जनताको पैसामा चलेको संस्थाको दुर्दशा
जनताको कर, राज्यको लगानी र स्थानीय सरकारको प्रतिष्ठाले चलेको अस्पताल आज निजी स्रोतका कर्मचारीलाई तलब खुवाउन नसक्ने अवस्थामा पुगेको छ । यो आर्थिक संकट संयोग होइन, व्यवस्थापकीय असफलताको परिणाम हो । सञ्चालक समिति मौन छ, नगरपालिका चुप छ, प्रशासन अलमलमा छ । अनि जिम्मेवार को ?
अब मौन बस्नु अपराध हो
दुधौली नगर अस्पताल सिथौली कुनै प्रयोगशाला होइन, जहाँ असफल प्रयोग दोहोर्याइरहने छुट हुन्छ । यो जनताको जीवनसँग जोडिएको संस्था हो ।
अब पनि यदि—
- सञ्चालक समिति पुनर्गठन हुँदैन
- आन्तरिक किचलो अन्त्य हुँदैन
- कर्मचारी र चिकित्सकको व्यवहारमा सुधार हुँदैन
- सेवाग्राहीको गुनासोलाई गम्भीरतापूर्वक सुन्ने संयन्त्र बनाइँदैन
भने सिथौली अस्पतालको पतन रोक्न अब कसैले सक्ने छैन ।
