दुधौली एफ. एम. सम्बाददाता
सिन्धुली / दुधौली नगर अस्पताल सिर्थौलीलाई सुरक्षित, भयमुक्त र शान्तिपूर्ण बनाउने विषयमा सर्वपक्षीय छलफल सम्पन्न भएको छ । सोमबार अस्पतालको सभाहलमा बसेको छलफलमा सहभागी सरोकारवालाहरुले अस्पताललाई संवेदनशील क्षेत्रका रूपमा हेरिंदै त्यहाँ कार्यरत चिकित्सक र स्वास्थ्यकर्मीलाई त्रसित नबनाउन आग्रह गरेका हुन् । कार्यक्रममा सहभागिहरुका अनुसार अस्पतालमा कसैले पनि अनावस्यक आतंक मचाउने प्रयास गरेमा सजायको भागेदार बन्नु पर्ने बताएका छन् ।
अस्पतालले पछिल्ला वर्षहरूमा सर्पदंश, प्रसूति, मनोचिकित्सा तथा दुर्घटना उपचारसहितका सेवामा उल्लेखनीय सुधार ल्याएको भन्दै सहभागीहरूले दुधौलीवासीको स्वास्थ्यस्तरमा सकारात्मक परिवर्तन आएको बताएका थिए । कुनै समय स्वास्थ्य क्षेत्रमै पछाडि परेको कमलाखोज क्षेत्रमा देखिएको यो सुधारले जनतामा आशा जगाएको भन्दै सबै पक्षले अस्पताललाई सुरक्षित र भयमुक्त बनाउन साझा जिम्मेवारीका साथ अघि बढ्ने प्रतिबद्धता जनाएका छन् ।
छलफल दुधौली नगरपालिकाका कार्यवाहक नगरप्रमुख चन्द्रकिशोर थारुको अध्यक्षतामा सम्पन्न भएको थियो । कार्यक्रममा प्रमुख प्रशासकीय अधिकृत दिनेशराज पन्त, नगर कार्यपालिका सदस्यहरू, वडाअध्यक्षहरू, नेकपा एमाले, नेपाली कांग्रेस, नेकपा माओवादीका अध्यक्ष संगै विभिन्न राजनीतिक दलका प्रमुख तथा प्रतिनिधिका साथै जनप्रतिनिधिहरूको समेत उपस्थिति थियो ।
हालै केही सेवाग्राहीबाट आएको धम्की र त्रासपूर्ण अभिव्यक्तिप्रति असन्तुष्टि जनाउँदै चिकित्सक र स्वास्थ्यकर्मीहरूले गुनासो गरेपछि सो छलफल बोलाइएको नगरपालिकाले जनाएको छ ।
