दुधौली, सिन्धुली । दुधौली नगरपालिकाका नगर प्रमुख दिनेश अधिकारी दनुवारले पूर्व प्रधानमन्त्री तथा नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ समक्ष नगरपालिकाको विकाससम्बन्धी माग पत्र हस्तान्तरण गर्नुभएको छ।
आज नेकपा (माओवादी केन्द्र) दुधौली नगर कमिटीको दोस्रो नगर अधिवेशनको अवसरमा प्रमुख अतिथि तथा पार्टी अध्यक्ष दाहालको उपस्थितिमा नगर प्रमुख अधिकारीले उक्त पत्र बुझाउनु भएको हो।
नगर प्रमुख अधिकारीद्वारा बुझाइएको पत्रमा कमला कोरिडोरसँगै बृहत् नगर खानेपानी योजना, पुल, सडक तथा अन्य पूर्वाधार विकासका विभिन्न महत्वपूर्ण मागहरू समेटिएको छ। नगरपालिकाको समग्र विकास, शिक्षा, स्वास्थ्य, कृषि तथा अन्य आवश्यक क्षेत्रहरूको प्रवर्द्धनका लागि संघीय सरकारको आवश्यक सहयोग र समन्वयको माग गर्दै छलफल गरिएको छ।
नगरपालिकाको वर्तमान अवस्था, विकास योजनाहरू, आवश्यक बजेट तथा संघीय सरकारसँगको समन्वयबारे विस्तृत रूपमा कुराकानी भएको नगर प्रमुख अधिकारीले जानकारी दिनुभएको छ। अध्यक्ष प्रचण्डले विकास योजनाहरूलाई प्राथमिकताका साथ सम्बोधन गर्ने प्रतिबद्धता व्यक्त गर्दै आवश्यक सहयोगका लागि पहल गरिने आश्वासन दिनुभएको छ।
दुधौली नगरपालिकाले हालसम्म विभिन्न विकास योजनाहरूको सञ्चालन शिक्षा स्वास्थ्य र कृषिमा बिशेष जोड दिईरहेको छ । आगामी दिनमा स्थानीय तहको समृद्धिका लागि थप संघीय तथा प्रदेश सरकारको सहकार्य आवश्यक रहेको नगरपालिकाले जनाएको छ।
