दुधौली एफ. एम. सम्वाददाता
दुधौली, सिन्धुली – २०८२ जेठ २१ गते, बागमती प्रदेश प्रहरी तालिम केन्द्र, दुधौली, सिन्धुलीमा कार्यरत रहनुभएका प्रहरी वरिष्ठ उपरीक्षक (एसएसपी) प्रवीण पोखरेलज्यूको सरुवालाई अवसर बनाएर आज एक भावनात्मक “विदाई तथा फेरि भेटौंला” कार्यक्रम सम्पन्न भएको छ।
नेपाल प्रहरी प्रधान कार्यालय, मानवश्रोत विकास विभाग, कर्मचारी प्रशासन शाखा, नक्सालको मिति २०८२/०२/१६ गतेको पत्र (च.नं. ७२८७) अनुसार पोखरेलज्यूको राष्ट्रिय सुरक्षा परिषद् सचिवालय, सिंहदरबार, काठमाडौंमा सरुवा भएसँगै आयोजित कार्यक्रममा केन्द्रका निमित्त समादेशक प्रहरी निरीक्षक देवेन्द्र दासज्यूले उहाँलाई टिका, खादा र मायाको चिनो प्रदान गर्दै बिदाई गर्नुभयो।
कार्यक्रममा उपस्थित सम्पूर्ण प्रहरी कर्मचारीहरू, साथै हाल यस केन्द्रमा तालिमरत उन्नत तथा प्रहरी जवान आधारभूत तालिम (६–२०४ औं समूह) का प्रशिक्षार्थीहरूको विशेष उपस्थिति रहेको थियो।
विदाई मन्तव्यका क्रममा प्रहरी वरिष्ठ उपरीक्षक पोखरेलज्यूले बागमती प्रदेश प्रहरी तालिम केन्द्रमा कार्यरत रहँदा प्राप्त अनुभव, सिकाइ र सहकर्मीहरूको साथ सहयोगको कदर गर्दै केन्द्रप्रति आफ्नो गहिरो आत्मीयता व्यक्त गर्नुभयो। साथै, उहाँले उपस्थित सम्पूर्ण प्रहरीजनलाई कर्तव्यनिष्ठ, अनुशासित र समर्पित भएर कार्य गर्न प्रेरणा दिनुभयो।
कार्यक्रमको वातावरण भावुक र प्रेरणादायक रहेको थियो। सहभागी सबैले पोखरेलज्यूको नयाँ जिम्मेवारीमा सफलताको कामना गर्दै पुनः भेटको अपेक्षा व्यक्त गरेका थिए।
