दुधौली एफ.एम. सम्बाददाता
दुधौली, सिन्धुली । दुधौली नगरपालिका–६ हर्साहीस्थित एक किराना पसलमा गरिएको बजार अनुगमनका क्रममा म्याद गुज्रिएका तथा अखाद्य वस्तु फेला परेपछि २५ हजार रुपैयाँ जरिवाना गरिएको छ। जिल्ला प्रशासन कार्यालय सिन्धुलीको नेतृत्वमा गरिएको संयुक्त अनुगमनका क्रममा हर्साहीस्थित प्रदिप किराना एण्ड कस्मेटिकबाट करिब १२ हजार ७५ रुपैयाँ बराबरका म्याद गुज्रिएका तथा उपभोगका लागि अयोग्य खाद्य सामग्री बरामद गरिएको हो।
अनुगमन टोलीका अनुसार पसलमा ठूलो मात्रामा म्याद नाघेका तथा गुणस्तरहीन सामग्री बिक्रीका लागि राखिएको अवस्थामा भेटिएको थियो। बरामद गरिएका सामग्रीमा बदाम इनर्जी ड्रिंक (२०० एमएल) का ४१ क्यान, बियर (५०० एमएल) का १२ वटा, जिराका ९ प्याकेट, करिब ४ केजी सडेको सुख्खा नरिवल, २५० ग्रामका ६ प्याकेट पापड, डेरी मिल्क चकलेटका ६ प्याकेट, प्रशोधित पिउने पानीका ६ कार्टुन, चिउराका १० प्याकेट, १०० ग्रामका ६ प्याकेट सौंफ, ५०० एमएलका २ बोतल जुस, ५० ग्रामका ५ प्याकेट मिट मसला, ट्विस्ट बिस्कुटका ७५ प्याकेट, मिरिण्डा र बिरेनुनका एक–एक बट्टा रहेका छन्।
अनुगमनका क्रममा अंग्रेजी मिति २०२४ डिसेम्बर २ मा उत्पादन गरिएको प्रशोधित पिउने पानीसमेत बिक्रीका लागि राखिएको पाइएको टोलीले जनाएको छ। उक्त पसलले उपभोक्ता हित विपरीत म्याद गुज्रिएका तथा अखाद्य वस्तु बिक्रीका लागि राखेको पाइएपछि सम्बन्धित कानुनी व्यवस्था अनुसार २५ हजार रुपैयाँ जरिवाना गरिएको अनुगमन टोलीले जनाएको छ।
जिल्ला प्रशासन कार्यालय सिन्धुलीका शाखा अधिकृत प्रवीण कटुवालको संयोजकत्वमा भएको अनुगमनमा उद्योग तथा वाणिज्य कार्यालय सिन्धुलीका प्रमुख टेकेन्द्र बहादुर थापा मगर, इलाका प्रशासन कार्यालय डकाहाका प्रमुख सपना खड्का, दुधौली नगरपालिकाका प्रतिनिधि तथा वडा जनप्रतिनिधिहरूको सहभागिता रहेको थियो।
बरामद गरिएका सम्पूर्ण अखाद्य तथा म्याद गुज्रिएका सामग्री अनुगमन टोलीको रोहवरमा तत्काल नष्ट गरिएको जनाइएको छ। अनुगमन टोलीले व्यवसायीहरूलाई म्याद गुज्रिएका वस्तु बिक्री नगर्न तथा उपभोक्तालाई खरिद गर्दा उत्पादन र उपभोग मिति अनिवार्य रूपमा जाँच गर्न आग्रह गरेको छ।
