दुधौली एफएम सम्बाददाता
काठमाडौं / नेकपा (एमाले) को एघारौं राष्ट्रिय महाधिवेशनबाट निर्वाचित अध्यक्षसहित सम्पूर्ण पदाधिकारी, केन्द्रीय कमिटी तथा केन्द्रीय निकायका सदस्यहरूलाई नेता ईश्वर पोखरेलले बधाइ तथा सफल कार्यकालको शुभकामना व्यक्त गर्नुभएको छ।
महाधिवेशन सम्पन्न भएपछि जारी गर्नुभएको बधाइ तथा धन्यवाद सन्देशमार्फत नेता पोखरेलले महाधिवेशन सफल बनाउन योगदान पुर्याउने सम्पूर्ण प्रतिनिधि तथा मतदाता कमरेडहरूप्रति आभार व्यक्त गर्नुभएको हो। अध्यक्ष पदको प्रतिस्पर्धामा आफू विजयी बन्न नसके पनि आफ्नो उम्मेदवारीप्रति विश्वास गर्दै मत प्रदान गर्ने प्रतिनिधिहरूप्रति उहाँले हार्दिक धन्यवाद ज्ञापन गर्नुभएको छ।
नेता पोखरेलले महाधिवेशनको क्रममा उठाइएका जनताको बहुदलीय जनवादको प्रकाशमा सामूहिक नेतृत्व, विधि र पद्धतिअनुसार पार्टी सञ्चालन, नियन्त्रण र सन्तुलनको सिद्धान्तको पालन जस्ता विषयहरूले पार्टीभित्र निरन्तर बहस र छलफलको नयाँ स्तर कायम राख्ने विश्वास व्यक्त गर्नुभएको छ।
आफू निर्वाचित नहुँदा पनि देशभक्तिपूर्ण, लोकतान्त्रिक तथा समाजवादको आधार निर्माण गर्ने एमालेको अभियानमा आफ्नो सहभागिता र संलग्नता निरन्तर रहने प्रतिबद्धता उहाँले व्यक्त गर्नुभएको छ। साथै, नव–निर्वाचित नेतृत्वले पार्टीको कार्यकाल सफलतापूर्वक सम्पन्न गरोस् भन्ने कामनासमेत उहाँले गर्नुभएको छ।
