दुधौली एफएम सम्वाददाता
सिन्धुली / दुधौली नगरपालिका–५ स्थित माध्यमिक विद्यालय सिर्थौलीका प्रधानाध्यापक रमेश गौतम एकपछि अर्को विवादमा तानिनु भएको छ। पछिल्लो पटक नेपाली कांग्रेसको विशेष महाधिवेशनमा पार्टीको झोला बोकेर सहभागी भएको तस्बिर सार्वजनिक भएपछि उहाँ पुनः विवादमा पर्नु भएको हो।
सार्वजनिक तस्बिरअनुसार प्रधानाध्यापक गौतम नेपाली कांग्रेसको विशेष महाधिवेशनमा सिन्धुली क्षेत्र नं. १ का महाधिवेशन प्रतिनिधिका रूपमा काठमाडौं पुगेका छन्। यसअघि दुधौली नगरपालिका शिक्षा शाखाले शिक्षक पदपूर्तिका लागि सञ्चालन गरेको परीक्षामा प्रश्नपत्र बाहिरिएको आरोपमा पनि उहाँ विवादमा पर्नु भएको थियो।शिक्षक महासंघ दुधौली नगरको अध्यक्ष समेत रहनु भएको गौतम उक्त परिक्षा समितिको विज्ञको रुपमा रहनु भएको थियो ।
शिक्षा ऐन, २०२८ को दफा १६ ङ (५) (छ) अनुसार शिक्षक वा कर्मचारी राजनीतिक दलको कार्यकारिणी समितिको सदस्य भएको पाइएमा पदबाट हटाउन सकिने कानुनी व्यवस्था छ। साथै राजनीतिक दलसम्बन्धी ऐनले पनि सरकारी शिक्षक तथा कर्मचारीलाई राजनीतिक दलको सदस्य हुन नपाउने स्पष्ट व्यवस्था गरेको छ।
तर यी कानुनबीचको विरोधाभाषको गलत फाइदा उठाउँदै कतिपय शिक्षकहरूले राजनीतिक दलको सदस्यता लिने र सक्रिय राजनीतिक गतिविधिमा संलग्न हुने गरेको देखिन्छ। दलहरूले समेत शिक्षकलाई सदस्यता दिने प्रवृत्ति बढ्दो छ। ऐनले विद्यालयका शिक्षकहरूलाई राजनीतिक पद तथा गतिविधिमा संलग्न हुन प्रतिबन्ध लगाए पनि शिक्षकहरू खुलेआम दलका कार्यकर्ता वा महाधिवेशन प्रतिनिधिका रूपमा सहभागी हुँदा कानुन नै अप्रासंगिक बनेको भन्दै आलोचना हुन थालेको छ।
प्रधानाध्यापक जस्तो जिम्मेवार पदमा रहेका व्यक्तिको यस प्रकारको राजनीतिक संलग्नताले शैक्षिक क्षेत्रको निष्पक्षता र मर्यादामाथि प्रश्न उठाएको स्थानीयवासी तथा सरोकारवालाहरूको भनाइ छ।
