प्रतिमा दियाली,
दुधौली — प्रत्येक वर्षको एसईई परीक्षामा उत्कृष्ट अंक ल्याउने विद्यार्थीहरूलाई प्रोत्साहन गर्न स्थापना गरिएको खडानन्द पद्मकुमारी शिक्षा पुरस्कार अक्षय कोषद्वारा सञ्चालित वार्षिक सम्मान कार्यक्रम यस वर्ष पनि भव्य रूपमा सम्पन्न भएको छ।
दुधौली नगरपालिका–२ मा रहेको श्री कमला मा.वि. भलुवाहीको आयोजनामा सम्पन्न कार्यक्रममा कक्षा ११ मा अध्ययनरत गरिमा अधिकारीले खडानन्द पद्मकुमारी शिक्षा पुरस्कार २०७६ प्राप्त गर्दै नगद रु १०,१११ र प्रमाणपत्र प्राप्त गरेकी छिन्। उनलाई यो पुरस्कार वरिष्ठ साहित्यकार डा. कृष्णहरि बरालको हातबाट प्रदान गरिएको थियो।
त्यसैगरी कार्यक्रममा आयोजित गजल प्रतियोगितामा उत्कृष्ट स्थान हासिल गर्ने साहित्यकारहरूलाई समेत सम्मान गरिएको थियो। प्रतियोगितामा उपन्यासकार तथा साहित्यका केशव घिमिरे प्रथम, रोमन लामिछाने द्वितीय र प्रमिला श्रेष्ठ तृतीय स्थानमा रहन सफल भए। उनीहरूलाई क्रमशः नगद रु ५,१००, ३,१००, र २,१०० सहित प्रमाणपत्र प्रदान गरिएको थियो।
कार्यक्रम विद्यालय व्यवस्थापन समितिका जेष्ठ सदस्य जंग बहादुर राईको अध्यक्षता, दुधौली नगरपालिका वडा नं. २ का वडा अध्यक्ष रितेश राउतको प्रमुख आतिथ्यता, र डा. कृष्णहरि बरालको विशेष आतिथ्यतामा सम्पन्न भएको हो। कार्यक्रममा विभिन्न संघ–संस्थाका प्रमुख तथा प्रतिनिधिहरू, साहित्यकार, शिक्षकगण र विद्यार्थीहरूको उल्लेखनीय उपस्थिति रहेको थियो।
उपन्यास “रूपिका” का लेखक केशव घिमिरे, जो यस पटकको गजल प्रतियोगिताका प्रथम विजेता पनि हुन्, विगत एक दशकदेखि साहित्य क्षेत्रमा सक्रिय छन्। उनले पुरस्कार ग्रहण गर्दै भने, “बालकक्षादेखि पढेको आफ्नै विद्यालयले सम्मान गर्दा निकै भावुक र गौरवान्वित महसुस भएको छ।” उनले कार्यक्रममा सहभागी सम्पूर्ण गुरुजन तथा आयोजकप्रति आभार व्यक्त गरे।
साहित्यकार डा. कृष्णहरि बरालले यस्तो कार्यक्रमले विद्यार्थीहरूमा सिर्जनात्मकता र साहित्यप्रतिको अभिरुचि अझ बढाउने विश्वास व्यक्त गर्दै भने, “यसले भावी पुस्तामा लेखन र अध्ययनप्रतिको प्रेरणा जगाउनेछ।”
