दुधौली एफएम संवाददाता
नेपाल आदिवासी जनजाति महासंघ जिल्ला समन्वय परिषद् सिन्धुलीको छैटौं जिल्ला अधिवेशनले इन्द्र भुजेललाई सर्वसम्मत रूपमा अध्यक्ष चयन गरेको छ।
शनिबार सम्पन्न अधिवेशनले लामो समयदेखि आदिवासी जनजातिको हक, अधिकार, भाषा, संस्कृति तथा पहिचानको पक्षमा सक्रिय रूपमा आवाज उठाउँदै आएका भुजेललाई नयाँ नेतृत्वको जिम्मेवारी दिएको हो। विभिन्न आदिवासी जनजाति आन्दोलनमा नेतृत्वदायी भूमिका निर्वाह गर्दै आएका भुजेल जिल्लामा जनजाति समुदायका साझा आवाजका रूपमा परिचित छन्।
स्पष्ट वक्ता तथा विषयगत बहसमा सशक्त रूपमा आफ्ना धारणा राख्न सक्ने क्षमताका कारण भुजेलले आदिवासी जनजातिका मुद्दालाई प्रभावकारी ढंगले उठाउँदै आएका छन्। उनको नेतृत्वमा महासंघले जिल्लाभित्र रहेका विभिन्न आदिवासी जनजाति समुदायका हक, अधिकार, भाषा, संस्कृति र पहिचान संरक्षणका विषयलाई अझ सशक्त र परिणाममुखी ढंगले अघि बढाउने विश्वास गरिएको छ।
निवर्तमान जिल्ला सचिवसमेत रहेका भुजेललाई जिल्लाभर क्रियाशील विभिन्न १० वटा जातीय संस्थाहरूको सर्वसम्मत समर्थन प्राप्त भएको थियो। सहमतिमै नेतृत्व चयन भएकाले महासंघभित्रको एकता र सहकार्य अझ मजबुत हुने अपेक्षा गरिएको छ।
जिल्ला समन्वय परिषद् सिन्धुलीका अध्यक्ष तुलबहादुर गुरुङको अध्यक्षतामा सम्पन्न अधिवेशनमा नेपाल आदिवासी जनजाति महासंघका केन्द्रीय महासचिव विमल सारु मगर प्रमुख अतिथिका रूपमा सहभागी भएका थिए। कार्यक्रममा विभिन्न आदिवासी जनजाति समुदायका प्रतिनिधि, सामाजिक अभियन्ता, संघसंस्थाका पदाधिकारी तथा सरोकारवालाहरूको उल्लेखनीय उपस्थिति रहेको थियो।
अधिवेशनले जिल्लाका आदिवासी जनजाति समुदायका साझा मुद्दालाई प्रभावकारी रूपमा उठाउने, समुदायबीच एकता सुदृढ गर्ने तथा भाषा, संस्कृति र पहिचान संरक्षणका अभियानलाई थप सशक्त बनाउने प्रतिबद्धता व्यक्त गरेको छ। नयाँ नेतृत्व चयनसँगै महासंघले जिल्लामा आदिवासी जनजातिको अधिकार र पहिचानका सवाललाई अझ सशक्त रूपमा अघि बढाउने अपेक्षा गरिएको छ।
