दुधौली एफएम सम्बाददाता
दुधौली/ दुधौली नगरपालिकाको लैङ्गिक समानता तथा सामाजिक समावेशीकरण (लै.स.सा.स.) उपशाखाको आयोजनामा नगरस्तरीय वक्तृत्वकला प्रतियोगिता सम्पन्न भएको छ। “समावेशी शासनका लागि महिला सहभागिता” विषयमा आयोजित उक्त प्रतियोगितामा पालिकाभित्रका माध्यमिक तहका विद्यार्थीहरूको उल्लेख्य सहभागिता रहेको थियो।
कार्यक्रमको अध्यक्षता दुधौली नगरपालिकाका कार्यवाहक नगरप्रमुख चन्द्र किशोर थारुले गर्नुभएको थियो। नगरपालिकाभित्र रहेका २५ माध्यमिक विद्यालयमध्ये २१ विद्यालयले प्रतियोगितामा सहभागिता जनाएका थिए।
प्रतियोगितामा सहभागी विद्यार्थीहरूले महिला सहभागिता, नेतृत्व विकास, निर्णय प्रक्रियामा महिलाको भूमिका, समान अवसर तथा समावेशी शासन व्यवस्थाको महत्वबारे प्रभावकारी रूपमा आफ्ना धारणा प्रस्तुत गरेका थिए। वक्ताहरूले महिला सशक्तीकरणबिना समृद्ध समाज निर्माण सम्भव नहुने उल्लेख गर्दै राज्यका हरेक तहमा महिलाको समान र अर्थपूर्ण सहभागिता आवश्यक रहेको बताएका थिए।
प्रतियोगितामा माध्यमिक विद्यालय सिर्थौलीकी छात्रा नबिया कुमारी कुमर प्रथम हुन सफल भइन्। त्यसैगरी सिन्धुली एकता बोर्डिङ स्कुलका छात्र संजोग बराल द्वितीय भएका छन्। कमलामाई इङ्लिस बोर्डिङ स्कुलकी छात्रा सिमा राउत तृतीय हुन सफल भइन् भने सिन्धुली सनराइज इङ्लिस बोर्डिङ स्कुलका छात्र भिम बहादुर खड्काले सान्त्वना स्थान हासिल गरेका छन्। विजयी विद्यार्थीहरूलाई प्रमाणपत्रसहित क्रमशः नगद रु. ८ हजार, रु. ६ हजार र रु. ४ हजार पुरस्कार प्रदान गरिएको थियो।
कार्यक्रममा बोल्दै कार्यवाहक नगरप्रमुख थारुले विद्यार्थीहरूमा नेतृत्व क्षमता, अभिव्यक्ति कला तथा सामाजिक विषयप्रतिको चेतना अभिवृद्धि गर्न यस्ता प्रतियोगिताले महत्वपूर्ण भूमिका खेल्ने बताउनुभयो। उहाँले महिला अधिकार, समानता र समावेशी शासनको अभ्यास विद्यालय तहदेखि नै विकास गर्न आवश्यक रहेको धारणा व्यक्त गर्नुभयो।
प्रतियोगिताको निर्णायक मण्डलमा कमला बहुमुखी क्याम्पसका क्याम्पस प्रमुख जीवन हरि आचार्य, शाखाकी सदस्य इन्दिरा निरौला तथा आधारभूत विद्यालय झुङाका प्रधानाध्यापक निरज कार्की रहनुभएको थियो।
कार्यक्रममा शिक्षक, अभिभावक, विद्यार्थी तथा नगरपालिकाका कर्मचारीहरूको समेत उपस्थिति रहेको थियो। प्रतियोगिताले विद्यार्थीहरूलाई आफ्ना विचार प्रस्तुत गर्ने अवसर प्रदान गर्नुका साथै समसामयिक सामाजिक विषयप्रति सचेतना अभिवृद्धि गरेको आयोजकले जनाएको छ।
