प्रतिमा दियाली
दुधौली, सिन्धुली —७ असार २०८२
राष्ट्रिय स्वतन्त्र पार्टी (रास्वपा) को स्थापनाको तेस्रो वार्षिकोत्सवको अवसरमा रास्वपा दुधौली नगर समितिले “दुर्घटना न्युनिकरण तथा सचेतना कार्यक्रम” सफलतापूर्वक सम्पन्न गरेको छ। कार्यक्रम दुधौली नगरपालिका–१० स्थित मदन भण्डारी राजमार्गको शहिद स्मृति पार्क नजिकै रहेको ट्राफिक प्रहरी बिटको छेउमा आयोजना गरिएको थियो।
सो कार्यक्रम इलाका प्रहरी कार्यालय डकाहा र नगर अस्पताल सिर्थौलीको सहयोगमा सञ्चालन गरिएको थियो। कार्यक्रमको क्रममा ट्राफिक प्रहरीको तर्फबाट हवल्दार हरेराम खतिवडा र नगर अस्पतालका सूचना अधिकारी श्बल बहादुर खत्रीले सवारी दुर्घटना न्युनिकरण तथा दुर्घटनापछि अपनाउनु पर्ने प्राथमिक उपचार र सावधानीका विषयमा सहभागीहरूलाई जानकारी गराएका थिए।
कार्यक्रमका क्रममा मदन भण्डारी राजमार्गमा गुडिरहेका करिब २०० सवारी साधनका चालकहरूलाई संयमित र होसियारीपूर्वक सवारी चलाउन अनुरोध गर्दै चेतनामूलक सन्देशहरू वितरण गरिएको थियो। दुर्घटनाबाट बच्न सडक सुरक्षाको महत्त्व, ट्राफिक नियमको पालना, र जीवन रक्षाका उपायहरूबारे चालकहरूलाई प्रत्यक्ष रूपमा सन्देश दिइएको थियो।
रास्वपा दुधौली नगर अध्यक्ष विजय कार्कीका अनुसार कार्यक्रम सफल रूपमा सम्पन्न गर्न योगदान पुर्याउने सम्पूर्ण अग्रज कार्यकर्ता, शुभचिन्तक तथा सहयोगी संस्थाहरूलाई नगर समितिको तर्फबाट विशेष धन्यवाद व्यक्त गरिएको छ।
कार्यक्रमको समापनमा रास्वपा दुधौली नगर समितिका सचिव दिनेश प्रसाद सापकोटाले उपस्थित सबैलाई आभार व्यक्त गर्दै राष्ट्रिय स्वतन्त्र पार्टीको तेस्रो वार्षिकोत्सवको अवसरमा जनहितका यस्ता कार्यक्रमहरू निरन्तर सञ्चालन गरिने प्रतिबद्धता जनाएका थिए।
