दुधौली एफ.एम. सम्वाददाता
दुधौली / सिन्धुलीको दुधौली नगरपालिका क्षेत्रमा वन क्षेत्र अतिक्रमण गरी निर्माण गरिएका अवैध घर, टहरा, गोठ तथा लगाइएका फलफूलबाली हटाउने अभियान सुरु गरिएको छ। सामुदायिक वन उपभोक्ता समितिको अनुरोधमा डिभिजन वन कार्यालय सिन्धुलीको समन्वय तथा दुधौली नगरपालिकाको सहयोगमा अतिक्रमित क्षेत्र पहिचान गरी हटाउने कार्य अघि बढाइएको हो।
अभियानको पहिलो चरण दुधौली नगरपालिका–१० स्थित मंगलपुर सामुदायिक वन क्षेत्रबाट सुरु गरिएको सब डिभिजन वन कार्यालय दुधौलीले जनाएको छ। वन क्षेत्रभित्र अनधिकृत रूपमा बनाइएका टहरा, गोठ तथा खेतीपाती हटाउन नगर प्रहरी, वन कर्मचारी र स्थानीय सरोकारवालाको सहभागिता रहेको थियो।
जिल्ला वन कार्यालय सिन्धुलीका अनुसार दुधौली नगरपालिका भित्र वन क्षेत्रको कति जग्गा अतिक्रमणमा परेको छ भन्ने यकिन तथ्यांक नभए पनि सयौं बिघा क्षेत्रफल अवैध रूपमा कब्जा भएको हुन सक्ने अनुमान गरिएको छ।
मंगलपुर सामुदायिक वन उपभोक्ता समितिका अध्यक्ष बिल्टु कुमार दनुवारका अनुसार वडा नं. १० को उक्त वन क्षेत्रमा मात्रै करिब ३ देखि ४ बिघाभन्दा बढी जग्गा अतिक्रमणमा परेको छ।
नगर प्रहरी दुधौलीका इन्चार्ज सुरेन्द्र कुमार दनुवारले अभियानको पहिलो दिनमै १५ घरधुरीले बनाएका टहरा, गोठ तथा लगाइएका फलफूलका बोटबिरुवा हटाइएको जानकारी दिए।
नगरपालिकाले वन क्षेत्र संरक्षण, सार्वजनिक सम्पत्तिको रक्षा तथा वातावरणीय सन्तुलन कायम गर्न आगामी दिनमा पनि अतिक्रमण हटाउने अभियान निरन्तर सञ्चालन गरिने जनाएको छ। स्थानीयवासीलाई वन क्षेत्र अतिक्रमण नगर्न तथा संरक्षणमा सहयोग गर्न आग्रह गरिएको छ।
