दुधौली एफ.एम. सम्बाददाता
दुधौली/ दुधौली नगरपालिकाको २३ औँ नगरसभा अधिवेशन बुधबार सफलतापूर्वक सम्पन्न भएको छ। अधिवेशनले आर्थिक वर्ष २०८३/०८४ का लागि १ अर्ब १२ करोड ५८ लाख रुपैयाँको अनुमानित बजेट, नीति तथा कार्यक्रम सर्वसम्मतिले पारित गरेको छ।
नगरसभामा कार्यवाहक नगर प्रमुख चन्द्रकिशोर थारुले आगामी आर्थिक वर्षका लागि बजेट प्रस्तुत गर्दै नगरको समग्र विकास, भौतिक पूर्वाधार निर्माण, शिक्षा, स्वास्थ्य, कृषि तथा सामाजिक क्षेत्रलाई प्राथमिकतामा राखिएको जानकारी दिनुभयो। प्रस्तुत बजेटमा नगरवासीको जीवनस्तर उकास्ने, सेवा प्रवाहलाई प्रभावकारी बनाउने तथा दिगो विकासलाई टेवा पुग्ने कार्यक्रमहरू समावेश गरिएको जनाइएको छ।
नगरसभाबाट आर्थिक वर्ष २०८३/०८४ का नीति, कार्यक्रम, बजेट तथा विभिन्न प्रस्तावहरूमाथि विस्तृत छलफल गरी आवश्यक निर्णयहरू सर्वसम्मतिले पारित गरिएको छ।
प्रस्तुत बजेटअनुसार चालु खर्चतर्फ ८३ करोड १२ लाख १ हजार ३ सय रुपैयाँ अर्थात् कुल बजेटको ७३.८३ प्रतिशत विनियोजन गरिएको छ भने पूँजीगत खर्चतर्फ २९ करोड ४५ लाख ९८ हजार ७ सय रुपैयाँ अर्थात् २६.१७ प्रतिशत छुट्याइएको छ।
बजेटको संरचनाले चालु खर्चको हिस्सा पूँजीगत खर्चको तुलनामा उल्लेख्य रूपमा बढी देखिए पनि नगरपालिकाले उपलब्ध स्रोत–साधनको प्रभावकारी परिचालन तथा सबै पक्षको सकारात्मक सहयोगबाट विकास खर्चलाई थप सन्तुलित बनाउँदै लैजाने अपेक्षा गरेको जनाएको छ।
नगरसभाले पारित गरेको नीति तथा कार्यक्रमले आगामी आर्थिक वर्षमा नगरको विकास निर्माण, सेवा प्रवाह तथा आर्थिक–सामाजिक रूपान्तरणलाई थप गति दिने विश्वास व्यक्त गरिएको छ।
