दुधौली एफ.एम. सम्बाददाता
सिन्धुली / श्रम संस्कृति पार्टीको बागमती प्रदेश अध्यक्षमा सिन्धुलीका निमासिं लामा (निम बहादुर मोक्तान) सर्वसम्मत रूपमा चयन हुनुभएको छ। गत जेठ ९ गते शनिबार काठमाडौंको चावहिलमा सम्पन्न बागमती प्रदेशस्तरीय भेलाले मोक्तानलाई अध्यक्षमा चयन गरेको हो।
पार्टीका केन्द्रीय उपाध्यक्ष लिकनाथ चुडालको प्रमुख आतिथ्यता तथा पार्टीका केन्द्रीय सदस्य एवं बागमती प्रदेश इन्चार्ज जनजित तामाङको अध्यक्षतामा सम्पन्न भेलाले मोक्तानको नेतृत्वमा ६१ सदस्यीय प्रदेश समिति गठन गरेको जनाएको छ। भेलाले पाँच जना उपाध्यक्ष पनि चयन गरेको छ। उपाध्यक्षहरूमा रामेछापका श्यामलाल योञ्जन, मकवानपुरका बिशोर राना मगर, काठमाडौंकी निता पाण्डे, काठमाडौंका सन्जय राई तथा ललितपुरका पशुपति तुलाधर चयन हुनुभएको छ।
त्यसैगरी प्रदेश सचिवमा काठमाडौंका जगन्नाथ पौडेल चयन हुनुभएको छ भने सहसचिवहरूमा काठमाडौंका टेक बहादुर लिम्बु, भक्तपुरका रन्तमान शंकरदेव, सिन्धुलीका मेग बहादुर तामाङ तथा काठमाडौंका आईतराम राई चयन हुनुभएको छ। भेलाले प्रदेश कोषाध्यक्षमा काठमाडौंका नवराज थापालाई सर्वसम्मत चयन गरेको छ भने सह–कोषाध्यक्षमा चितवनका राजु नेपाल र काठमाडौंकी रेणु श्रेष्ठ चयन हुनुभएको जनाएको छ।
नवनिर्वाचित अध्यक्ष मोक्तानले पार्टीलाई श्रमिक, युवा तथा उत्पीडित समुदायको पक्षमा अझ सक्रिय र संगठित रूपमा अघि बढाउने प्रतिबद्धता व्यक्त गर्नुभएको छ।
