दुधौली एफएम सम्वाददाता
दुधौली एफएम, सिन्धुली – सिन्धुलीको दुधौली नगरपालिकाले बगमती प्रदेश प्रहरी तालिम केन्द्र, दुधौलीलाई ५ लाख रुपैयाँ बराबरको फर्निचर सहयोग गरेको छ। तालिम केन्द्रमा प्रशिक्षणका लागि आउने नयाँ तथा पुराना प्रहरी प्रशिक्षार्थीहरूलाई आवश्यक कुर्सी तथा अन्य फर्निचर अभाव भएपछि नगरपालिकाले चालु आर्थिक वर्षको बजेटबाट सहयोग उपलब्ध गराएको हो।
दुधौली नगरपालिकाका कार्यवाहक नगर प्रमुख चन्द्रकिशोर थारुले सुरक्षा कर्मीहरूको मनोबल उच्च राख्दै सहज प्रशिक्षण वातावरण निर्माण गर्न नगरपालिका प्रतिबद्ध रहेको बताउनुभयो। उहाँले भन्नुभयो, “देशको सुरक्षा दिने प्रहरीलाई तालिमकै क्रममा भुइँमा बसेर चिसो सहनुपर्ने अवस्था देख्दा मनमा गम्भीर प्रश्न उठ्यो। कार्यपालिकाका सदस्यहरूलाई प्रस्ताव राखेपछि सबैको सहमतिमा हामी यो सहयोग गर्न सफल भएका हौँ। यो पर्याप्त होइन, तर सीमित स्रोतका बाबजुद पनि सहयोग गरेका हौँ।”
तालिम केन्द्रका प्रमुख तथा एसएसपी प्रभु प्रसाद ढकालका अनुसार नगरपालिकाको सहयोग रकमबाट करिब १०० साल पुरानो काठ प्रयोग गरी फर्निचर निर्माण गरिएको छ। साथै, प्रशिक्षण कक्षका लागि ३०–३० वटा आधुनिक कुर्सी खरिद गरिएको उहाँले जानकारी दिनुभयो। उहाँले भन्नुभयो, “पहिले जवानदेखि माथिल्लो दर्जासम्मका प्रहरीले चिसो भुइँमै बसेर तालिम गर्नुपर्ने बाध्यता थियो। अब कुर्सीमै बसेर क्याम्पस तथा इन्स्टिच्युट सरहको वातावरणमा प्रशिक्षण गर्न पाउने भएका छन्, जसले प्रशिक्षार्थीहरूको सहजता र मनोबल दुवै बढाएको छ।”
नगरपालिकाको सहयोगपछि तालिम प्रशिक्षण कक्षमा प्रहरी प्रशिक्षार्थीहरू भुइँमा बसेर तालिम गर्नुपर्ने बाध्यताबाट मुक्त भएका छन्। कुर्सी अभावकै कारण चिसो भुइँमै बसेर प्रशिक्षण गर्नुपर्दा प्रहरीहरूलाई स्वास्थ्य र मनोवैज्ञानिक असर पर्ने जोखिम बढेको थियो। तर, अब पर्याप्त बस्ने व्यवस्था भएपछि प्रशिक्षण प्रक्रिया थप प्रभावकारी र सहज हुने विश्वास लिइएको छ।
दुधौली नगरपालिकाले स्थानीय सरकार–सुरक्षा निकाय सहकार्यको उदाहरण प्रस्तुत गर्दै तालिम केन्द्रलाई उपलब्ध गराएको सहयोगलाई जिल्लामै प्रशंसनीय कदमका रूपमा हेरिएको छ।
