दुधौली एफएम सम्बाददाता
पुस ५, सनिवार
दुधौली / दुधौली नगर अस्पताल सिर्थौलीमा अख्तियार दुरुपयोग अनुसन्धान आयोग बर्दिवासले छापा मारेको खुलासा भएको छ। दुधौली नगरपालिकाको कार्यालयमा छापा परेको सोही दिन नगर अस्पतालमा पनि अख्तियारको टोली पुगेको भए पनि अस्पताल व्यवस्थापन समिति तथा कर्मचारीहरूले यस विषयलाई गुपचुप राखेका छन्।
अस्पताल स्रोतका अनुसार औषधि खरिद प्रक्रियामा अनियमितता, मेडिकल सुपरिटेन्डेन्टको तलब तथा सेवा–सुविधा, आवश्यक मेसिन तथा उपकरण खरिदसम्बन्धी विषयमा अख्तियारमा उजुरी परेपछि छापा मारिएको हो। तर छापा परेको यति लामो समय बितिसक्दा पनि नगर अस्पतालले औपचारिक रूपमा कुनै जानकारी सार्वजनिक नगरेको भन्दै स्थानीयस्तरमा प्रश्न उठ्न थालेको छ।
अख्तियारमा परेको उजुरीमा नगर अस्पतालभित्र नीतिगत तथा आर्थिक अनियमितता भएको दाबी गरिएको छ। उजुरीमा छात्रवृत्तिमा अध्ययन गरेका चिकित्सकले नेपाल सरकारले तोकेको तलब–भत्तामै दुई वर्ष सेवा गर्नुपर्ने स्पष्ट सम्झौता हुँदाहुँदै मासिक ४ लाख २७ हजार रुपैयाँ तलब दिइएको, भिडियो एक्स–रे सेवामा ७० प्रतिशत शुल्क लिइएको तथा मनोचिकित्सा सेवा अत्यावश्यक नहुँदा पनि चिकित्सकलाई ७५ प्रतिशत प्रोत्साहन भत्ता दिइएको उल्लेख छ।
त्यसैगरी अहेव तथा अ.न.मी. पदका लागि विज्ञापन गर्दा मासिक १८ हजार रुपैयाँ तलब तोकिए पनि पछि नेपाल सरकारले तोकेको तलब–भत्ता दिइएको, समिति निर्णयअनुसार अस्पतालको आम्दानी तीन दिनभित्र बैंकमा दाखिला गर्नुपर्ने व्यवस्था कार्यान्वयन नभएको र रकम अपचलन भएको आशंका गरिएको छ।
उजुरीमा नीति, विधि र प्रक्रिया विपरीत पहुँचका आधारमा कर्मचारी नियुक्त गरी तलब–भत्ता दोहन गरिएको भन्दै नियुक्तिको आधार खोजी गरी कारबाही गर्नुपर्ने मागसमेत गरिएको छ। उजुरीकर्ताले माथि उल्लेखित बुँदाहरू पूरा भएमा चिकित्सकहरूले पनि नेपाल सरकारले तोकेको भन्दा बढी तलब–भत्ता नखोज्ने दाबी गरेका छन्।
यस विषयमा अख्तियार दुरुपयोग अनुसन्धान आयोगले अनुसन्धान गरिरहेको बताइए पनि नगर अस्पताल प्रशासन र दुधौली नगरपालिकाले हालसम्म आधिकारिक धारणा सार्वजनिक गरेका छैनन्। छापा जस्तो गम्भीर विषयलाई किन गोप्य राखियो भन्ने प्रश्नले दुधौली नगर अस्पतालको पारदर्शिता र सुशासनमाथि गम्भीर प्रश्न उठाएको छ।
