दुधौली एफ.एम. सवाददाता
हेटौंडा, असार २०८२ — बागमती प्रदेश सभाले सोमबार बसेको बैठकबाट दुईवटा महत्वपूर्ण उद्योग तथा व्यापार सम्बन्धी विधेयकहरू सर्वसम्मत रूपमा पारित गरेको छ।
सभाबाट ‘प्रदेश औद्योगिक व्यवसाय ऐन २०७६’ र ‘प्रादेशिक व्यापार तथा व्यवसाय ऐन २०७६’ संशोधन गर्न बनेका विधेयकहरू पारित भएका हुन्। सभामुख भुवन कुमार पाठकले दुवै विधेयक निर्णयार्थ पेश गर्दा प्रदेश सभा बैठकले सर्वसम्मत रूपमा पारित गरेको घोषणा गरेका थिए।
उद्योग, वाणिज्य, भूमि तथा प्रशासन मन्त्री शुकमाया तामाङले विधेयकमाथि छलफलका लागि प्रतिवेदनसहितको प्रस्ताव पेश गरेकी थिइन्। छलफलमा उद्योग, पर्यटन तथा वातावरण समितिले तयार पारेको प्रतिवेदनमा प्रदेशसभा सदस्यहरूले व्यापक सहभागिता जनाएका थिए।
छलफलमा उठेका प्रश्नहरूको जवाफ दिँदै मन्त्री तामाङले संशोधनले प्रदेशभित्र सञ्चालित उद्योग र व्यवसायलाई थप सशक्त बनाउन सहयोग पुग्ने विश्वास व्यक्त गरिन्। उनले कानुनी जटिलता हटाइ सहज वातावरण निर्माण हुने र उद्यमीहरूको संख्या समेत बढ्ने आशा व्यक्त गरिन्।
प्रदेश सभा सचिवालयका अनुसार, यी विधेयकहरू प्रदेश प्रमुख दीपकप्रसाद देवकोटाबाट प्रमाणीकरण भएपश्चात कानुनी रुपमा ऐन बन्ने छन्।
