दुधौली एफएम सम्वाददाता
सिन्धुली / २०७९ सालको प्रतिनिधिसभा निर्वाचनमा सिन्धुली क्षेत्र नं. १ बाट प्रत्यासी उम्मेदवार रहनु भएकी मेनुका ठकुरीले यसपटक आफू उम्मेदवार नबन्ने निर्णय गर्नुभएको विषयमा स्पष्ट पार्दै मतदाता तथा शुभेच्छुकहरूलाई भ्रममा नपर्न आग्रह गर्नुभएको छ।
उहाँले पार्टीबाट टिकट नपाउनु भएको नभई यसपटक आफूले नै उम्मेदवार बन्न उपयुक्त नठान्नुभएको बताउनु भएको छ। “पार्टीले टिकट नदिएको होइन, यो पटक मैले आफैंलाई यहाँहरूको लागि योग्य उम्मेदवार नदेखेको हुँ,” भनी उहाँले बताउनुभएको छ। त्यसका कारणहरू समय आएपछि घरदैलो कार्यक्रममा सहभागी भई स्पष्ट पार्ने प्रतिबद्धता समेत उहाँले व्यक्त गर्नुभएको छ।
लोकतन्त्रको मूल आत्मा व्यक्ति नभई प्रणाली र विचार भएको उल्लेख गर्दै उहाँले नेतृत्व परिवर्तन लोकतान्त्रिक प्रक्रियाको स्वाभाविक अङ्ग भएको बताउनु भयो। “उम्मेदवार परिवर्तनशील हुन्छन्, तर पार्टीको विचार, नीति र संगठन निरन्तर रहन्छ,” उहाँको भनाइ छ।
राजनीति पद, कुर्सी वा सुविधाको विषय नभई धैर्य, निरन्तरता र इमान्दारिताको दीर्घ यात्रा भएको उल्लेख गर्दै उहाँले इतिहास निर्माण गर्नेहरू हार्दासमेत नभाग्ने र थाक्दासमेत नरोक्किने व्यक्तिहरू हुने धारणा राख्नु भएको छ।
आजको राजनीति रोजगारी, शिक्षा, उद्यमशीलता, प्रविधिमैत्री वातावरण तथा सम्मानजनक जीवनसँग प्रत्यक्ष रूपमा जोडिएको उल्लेख गर्दै उहाँले नागरिक स्वयंको सक्रिय सहभागिता अपरिहार्य रहेको बताउनु भएको छ।
यस निर्वाचनमा डर, लोभ र भ्रमबाट माथि उठी विवेक प्रयोग गर्न आग्रह गर्दै उहाँले मतदाताको अमूल्य मतबाट मात्र स्वच्छ, सक्षम तथा उत्तरदायी नेतृत्व स्थापना सम्भव हुने बताउनु भयो।
अन्त्यमा उहाँले सिन्धुली क्षेत्र नं. १ का उम्मेदवार धनेन्द्र कार्कीज्यूलाई मतदान गरी विजयी गराउन सबै मतदातासँग अनुरोध गर्नुभएको छ।
“आउनुहोस्, भविष्य अरूलाई होइन, आफैँलाई सुम्पौं,” भनी उहाँले अपीलमा उल्लेख गर्नुभएको छ।
