दुधौली एफ.एम सम्बाददाता
दुधौली / सिन्धुलीको दुधौली नगरपालिका स्थित कमला बहुमुखी क्याम्पस को व्यवस्थापन समिति गठनका लागि आगामी जेठ ९ गते शनिबार निर्वाचन हुने भएको छ। समितिको अध्यक्ष पदमा सहमति गराउने प्रयास भए पनि अन्ततः सहमति हुन नसकेपछि निर्वाचन प्रक्रियामार्फत नेतृत्व चयन गर्ने निर्णय गरिएको हो।
अध्यक्ष पदका लागि पूर्ण बहादुर खत्री, रामप्रसाद अधिकारी र तिलक बहादुर कार्कीको उम्मेदवारी परेको थियो। सहमतिका लागि गरिएको छलफलका क्रममा पूर्ण बहादुर खत्रीले आफ्नो उम्मेदवारी फिर्ता लिएपछि रामप्रसाद अधिकारी र तिलक बहादुर कार्कीबीच प्रतिस्पर्धा हुने भएको छ। निर्वाचनमा अधिकारीको चुनाव चिन्ह “मयूर” र कार्कीको “कुर्सी” रहेको जनाइएको छ।
निर्वाचन समितिले मतदानमा सहभागी हुने मतदाता सदस्यलाई अनिवार्य रूपमा आफ्नो पहिचान खुल्ने सक्कल परिचयपत्र साथमा ल्याउन आग्रह गरेको छ। मतदानका लागि नेपाली नागरिकताको प्रमाणपत्र, राष्ट्रिय परिचयपत्र, सवारी चालक अनुमति पत्र वा निर्वाचन आयोगद्वारा जारी मतदाता परिचयपत्रमध्ये कुनै एक सक्कल प्रमाणपत्र अनिवार्य रूपमा ल्याउनुपर्ने सूचनामा उल्लेख गरिएको छ।
निर्वाचन समितिले आवश्यक परिचयपत्र बिना मतदान प्रक्रियामा सहभागी गराउन नसकिने स्पष्ट पारेको छ।
