गुणा माया मगर
दुधौली, जेठ ९ –सिन्धुलीको दुधौली नगरपालिकामा उज्ज्वलता परियोजना अन्तर्गत विद्यालयबाहिर रहेका बालबालिकालाई शिक्षाको मूलधारमा ल्याउने उद्देश्यले एक दिने कार्यशाला सम्पन्न भएको छ।
दुधौली नगरपालिकाको सभाहलमा आयोजना गरिएको कार्यक्रममा कार्यवाहक नगर प्रमुख चन्द्र किशोर थारु प्रमुख अतिथिको रूपमा सहभागी थिए। कार्यक्रममा प्लान इन्टरनेशनलको साझेदारीमा दुधौली नगरपालिका, मानव तथा राष्ट्रिय विकास समाज ( हेण्डस नेपाल ) सिन्धुली तथा उज्ज्वलता वालिका सशक्तीकरण परियोजनाको आयोजनामा कार्यशाला संचालन गरिएको हो।
कार्यशालामा विद्यालयबाहिर रहेका बालबालिकाको पहिचान, भर्ना, निरन्तरता तथा वैकल्पिक सिकाइका उपायहरूका साथै अभिभावकमुखी कार्यक्रमहरूको समावेशी निर्देशिका तयार गर्ने विषयमा गहिरो छलफल भएको थियो। सहभागीहरूले शिक्षामा सबै बालबालिकाको पहुँच सुनिश्चित गर्न स्थानीय सरकारले ठोस नीति तथा कार्यक्रम ल्याउनु पर्नेमा जोड दिए।
कार्यक्रममा शिक्षा शाखा दुधौलीका प्रमुख हरिलाल बिश्वकर्मा, शिक्षा शाखाका फोकल पर्सन लाल बहादुर कार्की, पालिकाका २० वटा विद्यालयका प्रतिनिधिहरू, स्थानीय निकायका प्रमुख, सरोकारवाला संघसंस्था तथा सञ्चारकर्मीहरूको उपस्थिति थियो।कार्यशालाको सहजीकरण रामलाल धामीले र संयोजन कमला लामाले गर्नुभएको थियो।
विद्यालयबाहिर रहेका बालबालिकाको पहिचानका उपायहरू, उनीहरूलाई विद्यालयमा भर्ना गराउने रणनीति, अध्ययनमा निरन्तरता सुनिश्चित गर्ने उपायहरू, वैकल्पिक सिकाइका कार्यक्रमहरूको विकास, पालिकाले अघि बढाउनुपर्ने नीतिगत तथा कार्यान्वयन पक्षहरू जस्ता बुँदाहरूमा छलफल तथा अन्तकृया गरिएको थियो । कार्यक्रम संयोजक कमला लमाका अनुसार छलफलका निष्कर्षहरूलाई स्थलगत अनुगमन, प्रतिवेदन तथा थप बहसपछि कार्यान्वयनमा लैजाने तयारी भइरहेको परियोजना कार्यक्रम संयोजक लामाले जानकारी दिनु भयो ।
यो कार्यशालाबाट तयार पारिने कार्यदिशा आगामी दिनमा विद्यालयबाहिर रहेका बालबालिकालाई पुनः शिक्षाको मूलधारमा ल्याउन महत्वपूर्ण कडी हुने अपेक्षा गरिएको छ।
