दुधौली एफएम सम्बाददाता
सिन्धुली / अनुशासन, नेतृत्व र सर्वाङ्गीण विकासको सशक्त अभ्यास गर्दै आधुनिक इंग्लिस बोर्डिङ स्कुलले राष्ट्रिय सेवादल तालिममा ‘बेस्ट प्लाटुन’ उपाधि हासिल गर्न सफल भएको छ । तालिम अवधिभर देखाएको उत्कृष्ट अनुशासन, टोलीगत समन्वय र बहुआयामिक प्रतिभाका कारण विद्यालयले यो गौरवपूर्ण उपलब्धि हात पारेको हो ।
तालिम अवधिभर प्रशिक्षक ज्ञानेन्द्र फुयाल र सरिता थारूको कुशल प्रशिक्षण तथा विद्यार्थीहरूको अथक मेहनतले यो सफलता सम्भव भएको विद्यालयले जनाएको छ । क्याडेटहरूको शारीरिक, मानसिक र नैतिक विकासमा खेल प्रशिक्षक गोविन्द चौहान, नृत्य प्रशिक्षक सागर आछामे लगायतले दिएको निरन्तर सहयोगले महत्वपूर्ण भूमिका खेलेको विद्यालयको भनाइ छ ।
प्रतियोगितात्मक विधातर्फ सार्वजनिक वक्तृत्वकलामा रन्जिता दर्लामी प्रथम स्थान हासिल गर्न सफल भइन् भने स्यान्ड मोडल ब्रीफिङमा सौगात काफ्ले प्रथम र बिबिशा बम्जन तेस्रो स्थानमा रहन सफल भए । यसैगरी नृत्य प्रतियोगिता, छात्र भलिबल तथा छात्रा भलिबलमा विद्यालयले दोस्रो स्थान प्राप्त गर्दै व्यक्तिगत मात्र होइन, टोलीगत क्षमताको समेत सशक्त प्रदर्शन गरेको छ ।
विद्यालयका प्रिन्सिपल भानु गुरुङले यस सफलतालाई विद्यार्थी, प्रशिक्षक र विद्यालय परिवारको साझा मेहनतको परिणाम भएको उल्लेख गर्दै भने, “हामी भविष्यमा पनि पढाइसँगै अनुशासन, नेतृत्व विकास र अतिरिक्त क्रियाकलापलाई समान प्राथमिकता दिनेछौं।” उनले राष्ट्रिय सेवादलको तालिमले विद्यार्थीमा देशप्रेम, जिम्मेवारीबोध र आत्मअनुशासन विकास गर्न महत्वपूर्ण योगदान पुर्याएको समेत बताए ।
राष्ट्रिय सेवादल तालिममा प्राप्त ‘बेस्ट प्लाटुन’ उपाधिले आधुनिक इंग्लिस बोर्डिङ स्कुललाई सिन्धुलीको शैक्षिक क्षेत्रमा मात्र होइन, अनुशासन र नेतृत्व विकासको केन्द्रका रूपमा समेत अझ सशक्त रूपमा स्थापित गरेको छ ।
पढाइसँगै व्यवहारिक सीप, अनुशासन र नेतृत्व विकासमा केन्द्रित आधुनिक इंग्लिस बोर्डिङ स्कुलको यो सफलता अन्य विद्यालयका लागि पनि प्रेरणाको स्रोत बनेको छ ।
