दुधौली एफएम सम्बाददाता
दुधौली/ गत असोज १७ देखि १९ गतेसम्म परेको अविरल वर्षाका कारण कमला नदीमा आएको बाढीले दुधौली नगरपालिका वडा नं. ९ र ११ लाई जोड्ने टाँडी पुल मुनि पूर्वतर्फ निर्माण गरिएको ड्याम भत्किएपछि पुनर्निर्माण प्रक्रिया अघि बढाइएको छ।
भत्किएको ड्याम पुनः निर्माण गर्न बागमती प्रदेश सरकारअन्तर्गत जलस्रोत तथा सिँचाइ विकास डिभिजन कार्यालय सिन्धुलीका कार्यालय प्रमुखसहितको प्राविधिक टोलीले स्थलगत अनुगमन गर्दै प्राविधिक मूल्याङ्कन तथा लागत स्टिमेट तयारीको काम सुरु गरेको छ। अनुगमनपछि तत्काल निर्माण कार्य अघि बढाउने तयारी गरिएको जनाइएको छ।
स्थलगत अनुगमन कार्यक्रममा बागमती प्रदेश सरकार सदस्य तथा पूर्व मन्त्री शुकमाया तामाङ, जलस्रोत तथा सिँचाइ विकास डिभिजन कार्यालय सिन्धुलीका प्रमुख निर्मल दाहाल तथा प्राविधिकहरू, दुधौली नगरपालिका वडा नं. ९ का वडा अध्यक्ष देवप्रसाद अधिकारी, नेकपा (एमाले) दुधौली नगर कमिटीका सचिव रमेश कार्की लगायत स्थानीय बासिन्दाहरूको उपस्थिति रहेको थियो।
स्थानीयवासीहरूले बाढीका कारण ड्याम भत्किँदा बस्ती, कृषि जमिन तथा भौतिक पूर्वाधारमा जोखिम बढेको भन्दै शीघ्र पुनर्निर्माणको माग गरेका छन्। प्राविधिक टोलीले जोखिम न्यूनीकरण र दीर्घकालीन समाधानलाई ध्यानमा राखी आवश्यक प्राविधिक पक्ष समेटेर लागत स्टिमेट तयार गरिने जानकारी दिएको छ।
ड्याम पुनर्निर्माण सम्पन्न भएपछि बाढीको जोखिम कम भई स्थानीय जनजीवन, कृषि र पूर्वाधार सुरक्षित हुने विश्वास लिइएको छ।
