सिन्धुली, दुधौली —
दुधौली नगरपालिका–६, दमनडाँडास्थित मुडुला कार्की कुलायन पूजा स्थल तथा बज्रबाराही पार्क परिसरमा वृक्षारोपण कार्यक्रम सम्पन्न भएको छ। मिति २०८२ भाद्र १४ गते शनिबारका दिन आयोजित कार्यक्रममा करिब १५० भन्दा बढी बिरुवाहरू रोपिएको आयोजक समितिले जानकारी दिएको छ।
कार्यक्रमका संयोजक तथा अभियन्ता रोहित कुमार कार्कीका अनुसार तेजपत्ता, गोलमोड, सिरिस, साकुरा लगायतका बहुवर्षीय प्रजातिका बिरुवाहरू लगाइएको हो। उनका अनुसार वृक्षारोपण कार्यक्रमले वातावरण संरक्षण, हरियाली विस्तार, स्वास्थ्य तथा सरसफाइप्रति सचेतना जगाउने र नागरिकलाई सामूहिक सहभागितामा जोड्ने उद्देश्य बोकेको छ।
यद्यपि कार्यक्रम मुडुला कार्की कुलायन व्यवस्थापन समितिको पहलमा आयोजना गरिएको भए पनि स्थानीयवासी, विभिन्न समुदायका प्रतिनिधि तथा समाजसेवीहरूको समेत सक्रिय सहभागिता रहेको थियो।
जानकारहरूका भनाइअनुसार दुधौली नगरपालिकाभित्र मुडुला कार्की कुलायन समुदाय सबैभन्दा ठूलो र व्यवस्थित संस्था मानिन्छ। यस कार्यक्रममार्फत समाजसेवा, वातावरण संरक्षण र नागरिक हितमा केन्द्रित रहने सन्देश प्रवाह भएको आयोजक समितिले जनाएको छ।
