दुधौली एफ.एम. संवाददाता
दुधौली, सिन्धुली – लामो समयको खडेरीपछि दुधौली क्षेत्रमा वर्षा भएको छ, जसका कारण स्थानीय किसानहरूमा खुसी छाएको छ। आइतवार दिउँसो परेको पानीले कमलाखोंच र आसपासका क्षेत्रका कृषकहरूलाई राहत मिलेको हो।
धान रोपाइँका लागि आवश्यक पानी नपाउँदा चिन्तित किसानहरू वर्षासँगै उत्साहित भएका छन्। दुधौली–११ सिरिपुरका कृषक परशुराम काफ्ले भन्छन्, “लामो समयदेखि पानी नपर्दा जमिन बाझै बस्ने अवस्था आएको थियो। आज वर्षा भएपछि ढिलै भए पनि बचेको धान रोप्न पाइने भयो।”
खडेरीका कारण धान रोपाइँ गर्न तयार खेत चिरा परेर सुकेको थियो। साथै, तयार गरेको धानको बेर्ना समेत सुक्न थालेको किसानहरूको अनुभव छ। यस वर्ष सिन्धुली जिल्लामा समयमै रोपाइँ हुन नसकेको तर आजको वर्षासँगै खेतबारीमा हरियाली फर्किने आशा जागेको दुधौली–१० का कृषक चुक्त बहादुर कार्कीले बताए।
पानीसँगै मौसममा आएको शीतलताले पनि स्थानीयहरूलाई राहत दिएको छ। अब किसानहरू धान रोपाइँका तयारीमा जुट्न थालेका छन्।
