दुधौली एफएम सम्वाददाता
दुधौली / नेपाली काँग्रेस दुधौली नगर स्तरीय कार्यकर्ता भेला तथा पार्टी प्रवेश कार्यक्रम भव्य रूपमा सम्पन्न भएको छ।आज पुस १४ गते सोमवारका दिन नेपाली काँग्रेस पार्टी दुधौली नगर समितिले दुधौली नगरमा संगठन विस्तारलाई तीव्र बनाउँदै विभिन्न दलमा कृयाशिल ५० जना प्रभावशाली नेता तथा कार्यकर्तालाई पार्टी प्रवेश गराई स्वागत गरेको छ । विभिन्न दल परित्याग गरी काँग्रेस पार्टीमा प्रवेश गर्नेहरूको सहभागितासँगै नगर स्तरीय कार्यकर्ता भेला उत्साहपूर्ण र भव्य रूपमा सम्पन्न बनाएको छ ।
नेपाली कांग्रेस दुधौली नगर समितिका सभापति बलराम कार्कीको सभापतित्व तथा काँग्रेस पार्टीका सचेतक एवं सिन्धुली क्षेत्र नं. १ का प्रतिनिधिसभा सदस्य श्याम प्रसाद घिमिरेको प्रमुख आतिथ्ययतामा कार्यक्रम आयोजना गरिएको हो।
कार्यक्रममा नेपाल कम्युनिस्ट पार्टी (नेकपा) जिल्ला कमिटी सदस्य तथा दुधौली नगर कमिटी उपाध्यक्ष रामशरण थापाको नेतृत्वमा ठूलो सङ्ख्यामा नेता तथा कार्यकर्ताहरू काँग्रेसमा प्रवेश गरेका छन्। पार्टी प्रवेश गर्नेहरूमा दुधौली नगरपालिका वडा नं. १० का वडा कमिटी उपाध्यक्ष मिना कुमारी तामाङ, संगठित सदस्य सन्तोष तामाङ, सनम तामाङ, बनिता तामाङसहित ३० जना, वडा नं. ११ का नेकपा (तत्कालीन समाजवादी) का वडा कमिटी अध्यक्ष बम बहादुर मगर, मिन बहादुर सुनुवार, रामचन्द्र अधिकारीसहित १० जना तथा वडा नँ. ६ का नेकपा एमाले नेता कमिया कुमारसहित ९ जना गरी जम्मा ५० जनाले विभिन्न पार्टी परित्याग गर्दै नेपाली काँग्रेसमा प्रवेश गरेका हुन्।
नवप्रवेशीहरूलाई पार्टी नेतृत्वले खादा तथा टीका लगाएर स्वागत गर्दै काँग्रेसको नीति, सिद्धान्त र लोकतान्त्रिक मूल्य–मान्यतामा प्रतिबद्ध रहन आग्रह गरेको थियो।
भेलामा नेपाली काँग्रेसको संगठन सुदृढीकरण, आगामी राजनीतिक रणनीति तथा स्थानीय तहमा पार्टीको भूमिकाबारे व्यापक छलफल गरिएको थियो। वक्ताहरूले काँग्रेस लोकतन्त्र, समावेशिता र जनताको अधिकारका लागि निरन्तर सङ्घर्षरत अभिभावक पार्टी भएको उल्लेख गर्दै दुधौली नगरमा पार्टी संगठनलाई अझ मजबुत बनाउने प्रतिबद्धता जनाए।
कार्यक्रमका विशिष्ट अतिथिहरूमा काँग्रेस जिल्ला सभापति उपेन्द्र कुमार पोखरेल, पूर्व जिल्ला सभापति उज्ज्वल प्रसाद बराल, संविधानसभा सदस्य मोहन प्रसाद बराल, काँग्रेस उपसभापति दीपक घिमिरेलगायत विभिन्न नेता तथा कार्यकर्ताहरूको उल्लेखनीय उपस्थिति रहेको थियो। भेलामा नगर क्षेत्रका नेता, कार्यकर्ता तथा शुभेच्छुकहरूको उल्लेखनीय उपस्थिति रहेको थियो।
कार्यकर्ता भेला तथा पार्टी प्रवेश कार्यक्रमले दुधौली नगरमा काँग्रेसको राजनीतिक गतिविधि थप सशक्त बनेको सहभागी कार्यकर्ताहरूले बताएका छन्। कार्यक्रमले नगर क्षेत्रमा काँग्रेस संगठन विस्तारका लागि नयाँ ऊर्जा र उत्साह थपेको विश्वास पार्टी नेतृत्वले व्यक्त गरेको छ।
