दुधौली एफ.एम. संवाददाता
०१ असोज २०८२
सिन्धुली । विश्वकर्मा पूजाको विशेष अवसर पारेर दुधौली एफ.एम.ले आफ्नो तेस्रो वार्षिकोत्सव मनाउँदै चौथो वर्षमा प्रवेश गरेको छ । दुधौली नगरपालिकास्थित कमलखोंचबाट सञ्चालन हुँदै आएको यस एफ.एम.ले स्थापना कालदेखि नै स्थानीय जनता र सरकारबीच सेतुको भूमिकामा निरन्तर क्रियाशील रहँदै आएको छ ।
सूचना, सन्देश र मनोरञ्जनका साथै विभिन्न भाषा–संस्कृतिलाई प्राथमिकता दिँदै समावेशी दृष्टिकोणमा आधारित कार्यक्रमहरू प्रसारण गर्दै आएको दुधौली एफ.एम.ले विश्वकर्मा पूजाको दिन अर्थात् तीन वर्षअघि नै परीक्षण प्रशारण सुरु गरेको थियो । तर, विभिन्न कारणवश आधिकारिक उद्घाटन केही दिनपछि मात्र सम्पन्न भएको थियो ।
तीन वर्षको सफल यात्रामा एफ.एम.ले श्रोता, सामाजिक सञ्जालमार्फत जोडिएका दर्शक, विज्ञापनदाता तथा सल्लाहकारप्रति आभार व्यक्त गर्दै आगामी दिनहरूमा अझ मजबुत साथ–सहयोगको अपेक्षा गरेको छ ।
यसै सन्दर्भमा, चौथो वर्ष प्रवेशसँगै “तपाईँसँग रेडियो” नामक नयाँ कार्यक्रम सुरु गर्ने घोषणा गरिएको छ । यो कार्यक्रम जनतासँग प्रत्यक्ष सरोकार राख्ने, उनीहरूको आवाज सुन्ने तथा सुख–दुःखका विषय साझा गर्ने उद्देश्यले सञ्चालन हुने भएको दुधौली एफ.एम.का प्रबन्धक तथा सञ्चालक दिपेन्द्र बुढाथोकीले जानकारी दिनुभयो ।
त्यसैगरी, एफ.एम.का अध्यक्ष दिल पौडेलले यस वर्ष विशेष कार्यक्रम गर्ने तयारी भए पनि देशको प्रतिकूल अवस्थाका कारण तोकिएको मिति अनुसारका कार्यक्रमहरू पछि सारिएको बताउनुभयो । उहाँका अनुसार परिस्थिती सामान्य हुँदै जाँदा स्थगित कार्यक्रमलाई आगामी दिनमा भव्य रूपमा आयोजना गरिनेछ ।
दुधौली एफ.एम. चौथो वर्षमा प्रवेशसँगै स्थानीय समुदायमा सूचना प्रवाह, जनचेतना अभिवृद्धि र मनोरञ्जनका क्षेत्रमा अझ सशक्त योगदान गर्ने दाबी गरेको छ ।
