दुधौली एफएम सम्बादाता
दुधौली / गत मंसिर १३ गते शनिवारदेखि सम्पर्क विहीन रहेका दिपेन्द्र केसी सवार सुमो गाडी उदयपुरको कटारी नगरपालिका–१४ स्थित किन्दु डाँडा पाखेमारा भीरबाट खसेको अवस्थामा फेला परेको छ। दुधौली नगरपालिकाका प्रहरी हवलदार मेख पौडेलका अनुसार घटनास्थलमा चालक केसीको शव घोप्टो अवस्थामा भेटिएको छ।
ललितपुर महालक्ष्मी–८ लुबुका दिपेन्द्र केसी काठमाडौँबाट उदयपुरको रुपाटार तर्फ जन्ती रिजर्भ लिन निस्किएका थिए। उनी सवार ना १ ज ५८१२ नम्बरको सुमो कटारी नगरपालिका–१४ को लामिडाँडा नजिकैबाट झण्डै करिव ३ सय मिटर भन्दा तल भीरमा खसेको अवस्थामा भेटिएको प्रहरीको प्रारम्भिक भनाई छ।
शनिवार राति ८:५८ बजे खुर्कोट प्रहरी बिटमा इन्ट्री गराएको गाडीको चालकसँग राति १०:५५ बजे अन्तिम पटक फोन सम्पर्क भएको थियो। त्यसपछि सम्पर्क विच्छेद भएपछि दुधौली नगर प्रहरी र जनपथ प्रहरीको संयुक्त टोलीले खोजी कार्य सुरु गरेको थियो।
मोबाइलको लोकेशन घटना अघिसम्म घुर्मी क्षेत्रमा करिब १०० मिटरको घेरा भित्र देखिएकाले सोही क्षेत्रमा खोजी केन्द्रित गरिएको थियो। स्थानीयवासीको सहयोगमा भीरको माथिल्लो भागमा माटोको ढिस्कोमा टायर धसिएको देखिएपछि प्रहरीले तल खोज्दा सुमोका पार्ट–पुर्जा फेला पारेका थिए। त्यही आधारमा तल झरेर हेर्दा चालक दिपेन्द्र केसी मृत अवस्थामा फेला परेका हुन्। मृतक केसी दुधौली नगरपालिकाकी नगर प्रहरी सुशीला कार्कीका पति हुन्। घटनाबारे थप अनुसन्धान भइरहेको प्रहरीले जनाएको छ। साथै, भीरमा अड्किएको शवलाई निकाल्ने कार्य निरन्तर जारी रहेको प्रहरीले जानकारी दिएको छ।
