दुधौली एफ.एम. सम्बाददाता
सिन्धुली, भाद्र १५ — सिन्धुलीको दुधौली नगरपालिका–१४, भौडीमा आमाको हत्या गरेको आरोपमा एक छोरालाई प्रहरीले नियन्त्रणमा लिएको छ।
मंगलवार बिहान करिब ११:३० बजेतिर घरायसी विषयमा विवाद भएपछि वर्ष ४० का तुला राज सुनुवारले आफ्नी आमा, वर्ष ६५ की फाल कुमारी सुनुवारमाथि फलामको खन्ती प्रहार गरेका थिए। टाउको र छातीमा लागेको चोटका कारण घटनास्थलमै आमाको मृत्यु भएको जिल्ला प्रहरी कार्यालय सिन्धुलीले जनाएको छ।
घटनापछि मृतकको शवलाई पोष्टमार्टमका लागि छिमेकी जिल्ला उदयपुरको कटारी अस्पताल लगिएको प्रहरीले जानकारी दिएको छ।
हत्या गरेको आरोपमा संलग्न तुला राज सुनुवार भने घटनापछि भाग्न खोज्दा स्थानीयवासीको सहयोगमा प्रहरी चौकी दुधौलीबाट खटिएको टोलीले नियन्त्रणमा लिन सफल भएको हो। थप अनुसन्धानका लागि इलाका प्रहरी कार्यालय डकाहाबाट प्रहरी निरीक्षक सिमोन धितालको कमाण्डमा प्रहरी टोली खटिएको प्रहरीले जनाएको छ।
जिल्ला प्रहरी कार्यालय सिन्धुलीका अनुसार घटना सम्बन्धमा हाल थप अनुसन्धान भइरहेको छ।
