प्रतिमा दियाली
सिन्धुली – २०८२ जेठ ३१
दुधौली / विद्यालय बाहिर रहेका बालबालिकाका लागि शैक्षिक कार्यक्रम निर्देशिका मस्यौदा सम्बन्धी परामर्श कार्यशाला सम्पन्न भएको छ। दुधौली नगरपालिका र हेण्ड नेपालको आयोजनाका साथै प्लान नेपालको सहकार्य तथा साझेदारमा कार्यशाला सम्पन्न गरिएको हो।
दुधौली नगरपालिकाका कार्यवाहक नगरप्रमुख चन्द्र किशोर थारू सभा अध्यक्षतामा भएको कार्यक्रममा विद्यालय बाहिर रहेका बालबालिकाको शैक्षिक समावेशीकरण, उनीहरूका लागि लक्षित शैक्षिक कार्यक्रमहरूको मस्यौदा निर्माण, विद्यालय भर्ना दर, उमेरअनुसारको विद्यार्थी अवस्था, स्थानीय शिक्षा नीति तथा ऐन–कानुन लगायतका विषयमा विस्तृत छलफल गरिएको थियो।
मस्यौदा माथि विस्तृत रूपमा छलफल गर्दै यो समैदालाई यथा शिघ्र पूर्णता दिनु पर्ने कार्यवाहक नगर प्रमुख थारूले बताउनु भयो । त्यसैगरी नमुना मावि लदाभिरका प्रधानाध्यापक मोहन शाहीले मासैदा सँगै स्थानीय सरकारले पनि विद्यार्थी ड्रप आउटको विषयमा ठोस रणनीति ल्याउनु पर्नेमा जोड दिनु भयो । त्यसै गरी मासैदा माथि कै छलफलको क्रममा नगरपालिकाका वडा अध्यक्ष तथा जन प्रतिनिधिहरूले विद्यालय बाहिर रहेका बालबालिकाहरूलाई विद्यालय सम्म ल्याउन शैक्षिक वातावरण सिर्जना गर्न सबैको महत्वपूर्ण भूमिका रहेको भन्दै वडाको तर्फबाट विशेष पहल गरिने प्रतिबद्धता जनाउनु भयो ।
कार्यशालाले नीति निर्माणको प्रारम्भिक चरणमै सरोकारवालाहरूको सहभागिता सुनिश्चित गर्दै बालमैत्री र समावेशी शैक्षिक रणनीति तयार गर्न योगदान पुर्याउने अपेक्षा गरिएको छ।
दुधौली नगरपालिकाको सभा हलमा सम्पन्न कार्यक्रममा दुधौली नगरपालिकाका कार्यवाहक नगरप्रमुख चन्द्र किशोर थारू, जिल्ला शिक्षा समन्वय इकाइ प्रमुख मोहन बहादुर सुनुवार, हेण्डस नेपालका अध्यक्ष बाशु अधिकारी, शिक्षा शाखा प्रमुख हरी लाल विश्वकर्मा, १४ वटै वडा अध्यक्ष, शिक्षाविद्, सामाजिक संघ संस्था, विभिन्न सरोकारवाला निकायका प्रतिनिधिहरू तथा स्थानीय तथा सरोकार संस्थाका प्रतिनिधिहरूको उल्लेखनीय सहभागिता रहेको थियो।
