दुधौली एफ.एम. सम्बाददाता
दुधौली — दुधौली नगरपालिकाको विभिन्न स्थानमा आज आकस्मिक रूपमा बाढी पस्दा स्थानीय त्रसित भएका छन्। सिन्धुलीको दुधौली नगरपालिका वडा नं. १ को बङ्का खोला र वडा नं. ४ मा रहेको विचित्र खोलामा आएको बाढी घर र खेतबारीमा पसेको हो।
वडा नं. १ को कार्यालय अगाडिको बङ्का खोलाले आसपासका करिब १० घर डुबानमा पारेको दुधौली नगरपालिका–२ का स्थानीय कमल अधिकारीले बताए। उहाँले भन्नुभयो, “दुधौलीको माथिल्लो डाँडामा पानी परिरहेको थियो। एक्कासी घरको दलानमै धमिलो पानी आयो, हेर्दा–हेर्दै भित्र पस्न थाल्यो। अझ केही समय वर्षा भएको भए धेरै घरभित्र पानी पस्ने अवस्था हुन्थ्यो।”
मदन भण्डारी राजमार्गसँगै रहेको उक्त क्षेत्रमा प्रत्येक वर्ष बाढी पस्ने गरेको स्थानीयले बताएका छन्। सडक निर्माणको क्रममा बङ्का खोलाको कल्भर्ट साँघुरो बनाइएकाले समस्या बढेको उनीहरूको गुनासो छ।
यस बाढीबाट खेमप्रसाद पहाडी, दिव्य हार्डवेयरका सञ्चालक दुर्गा बराल, डिल्लि सागरसहितका घरहरू बढी प्रभावित हुने गरेको छ। यसैगरी नन्दलाल पहाडी, शिवप्रसाद पहाडी, चन्द्रप्रसाद, गोविन्द पहाडी, वडा कार्यालय र आसपासका अन्य घरहरू पनि हरेक वर्ष डुबानमा पर्न बाध्य हुने गरेको स्थानीयले बताएका छन्। बारम्बार ध्यानाकर्षण गराउँदा पनि सुनुवाइ नभएको उनीहरूको आरोप छ।
यस्तै, दुधौली नगरपालिका–४ को तमर्णी खोलामा आएको बाढीले स्थानीयको धानबाली लगाइएका खेतहरूमा पनि पानी पसेको छ। हालसम्मकै ठूलो बाढी आएको भए पनि सामान्य क्षति बाहेक ठूलो नोक्सानी नभएको स्थानीयहरूको भनाइ छ।
दुधौली नगरपालिका विपद् व्यवस्थापन तथा वातावरण शाखा प्रमुख नारायण भट्टराईले दुधौली एफएमसँगको कुराकानीमा सतर्कता अपनाउन आग्रह गर्नुभएको छ । “खोला, खहरे र खेल्सामा आकस्मिक रूपमा बाढी आउन सक्ने भएकाले राति वा एक्लै अनावश्यक हिँडडुल नगर्न सबैलाई अनुरोध गर्दछौँ ।” उहाँले भन्नुभयो ।
