दुधौली एफ.एम. सम्बाददाता
सिन्धुली | साउन ९, सिन्धुलीको दुधौली नगरपालिका–३ कालापानीमा बाख्रा चराउने क्रममा भालुको आक्रमणबाट एक वृद्ध गम्भीर घाइते भएका छन्।
दुईपटकको आक्रमणपछि ८३ वर्षीय चन्द्र बहादुर बस्नेत घाइते भएका हुन्। घटना आज दिउँसो करिब २ः३० बजे घरबाट करिब ४ किलोमिटर दक्षिणतर्फ रहेको चुरे जंगलमा भएको हो।
छिमेकी विर बहादुर श्रेष्ठले घटनास्थलमै भेटेर उद्धार गरी घाइतेलाई दिउँसो ६ः१५ बजे दुधौली नगर अस्पताल सिर्थौली ल्याइएको थियो। प्रारम्भिक उपचारपछि गम्भीर चोट भएकाले उनलाई थप उपचारका लागि काठमाडौं रिफर गरिएको अस्पताल स्रोतले जानकारी दिएको छ।
भालुको आक्रमणबाट बस्नेतको दायाँ हात र दायाँ खुट्टा गम्भीर रूपमा घाइते भएको छ। हाल उनी बोल्न नसक्ने अवस्थामा रहेको अस्पतालले जनाएको छ।स्थानीय प्रशासनले वन क्षेत्रमा पशु चराउन जाँदा सावधानी अपनाउन सर्वसाधारणलाई आग्रह गरेको छ। दुधौली नगरपालिकाको सोहि वडाको जंगलमा केहि महिना अधि पनि भालु कै आक्रमणबाट एक युवा घाईते भएको थियो । आक्रमणमा परेका युवाको दाहिने हातमा गम्भिर चोट लागेको थियो ।
