दुधौली एफ.एम. सम्वाददाता
दुधौली, सिन्धुली – २०८२ जेठ २७
सिन्धुलीको दुधौली नगरपालिका–९ स्थित हनुमान मन्दिर परिसरमा एक पुरुषको शव फेला परेको छ। जिल्ला प्रहरी कार्यालय सिन्धुलीका अनुसार मृतक ६४ वर्षीय किसुन कुमर रहेको पुष्टि भएको छ।
शव आज दिउँसो करिब १२ बजेतिर फेला परेको हो। स्थानीयवासीले अपराह्न १२: बजे टेलिफोनमार्फत प्रहरी चौकी दुधौलीमा खबर गरेपछि प्रहरी सहायक निरीक्षक तेज नारायण धुरझारको नेतृत्वमा टोली घटनास्थलमा खटिएको थियो। टोलीले घटनास्थललाई सुरक्षित राखी आवश्यक अनुसन्धान प्रक्रिया सुरु गरेको छ।
प्रहरीका अनुसार घटनाबारे थप अनुसन्धानका लागि इलाका प्रहरी कार्यालय डकाहाबाट प्रहरी निरीक्षक सिमोन धितालको नेतृत्वमा अर्को टोली पनि घटनास्थल पुगेको जिल्ला प्रहरी कार्यालय सिन्धुलीले जनाएको छ ।
प्रारम्भिक अनुसन्धानमा मृतक किसुन कुमर मानसिक सन्तुलनमा नरहेको र मिति २०८२ साल जेठ १८ गतेदेखि घरबाट सम्पर्कविहीन रहेको पारिवारिक स्रोतले जानकारी दिएको छ।
हाल शव पोस्टमार्टमका लागि नगर अस्पताल सिर्थौली लगिएको प्रहरीको भनाइ छ। घटनाको विस्तृत विवरण आउन बाँकी रहेको र आवश्यक अनुसन्धान जारी रहेको प्रहरीले जनाएको छ।
