दुधौली एफ.एम. सम्वाददाता
दुधौली, सिन्धुली – दुधौली नगरपालिका–६ हर्षाही वडालाई २०८२ माघ महिनाभित्र बालमैत्री वडा घोषणा गर्ने लक्ष्यसहित विभिन्न कार्यक्रमहरू सञ्चालनमा आएका छन्। स्थानीय सरकार सञ्चालन ऐन, २०७४, बालमैत्री स्थानीय शासन कार्यान्वयन निर्देशिका २०७८, तथा घोषणा कार्यविधि २०७९ अनुसार वडा तथा समुदाय स्तरमा बाल अधिकारका सूचकहरू पूरा गर्न तालिम, अभियान, अभिमुखीकरण कार्यक्रमहरू सञ्चालन भइरहेका छन्।
वडा स्तरीय बाल अधिकार समितिका संयोजक प्रेमबहादुर लामाका अनुसार, बालमैत्री वडा घोषणाको पाँच चरणमध्ये हाल वडा कार्यान्वयन चरणमा पुगेको छ। यस चरणका सूचकहरू पुरा गर्न सातवटा टोल सुधार समिति गठन गरिएको छ भने अभिभावकहरूबाट बाल विवाह र बाल श्रम नगर्ने प्रतिवद्धतासहित हस्ताक्षर संकलन गरिएको छ।
समुदायस्तरमा ९ र विद्यालयस्तरमा ४ गरी कुल १३ वटा बाल क्लब गठन गरिएको छ। ती क्लबहरू मार्फत बाल अधिकार सुनिश्चित गर्ने, बाल विवाह न्यूनीकरण तथा विद्यालयबाहिर रहेका बालबालिकालाई पुनः विद्यालय फर्काउने अभियानहरू सञ्चालन भइरहेका छन्। बाल क्लबका अध्यक्ष ओमप्रसाद बरालले समुदायका केही बालबालिकालाई पुनः विद्यालय भर्ना गरिसकेको जानकारी दिनुभयो।
वडाका अध्यक्ष कमानसिंह आलेका अनुसार, शिक्षा, स्वास्थ्य र सरसफाइसँग सम्बन्धित सूचकहरू ९० प्रतिशतसम्म पूरा भइसकेका छन्। यद्यपि बाल विवाह तथा विद्यालयबाहिर रहेका बालबालिकाको संख्या न्यूनिकरणमा चुनौती कायमै रहेकाले सोहीअनुसार अभियानलाई तीव्र पारिएको छ।
बालमैत्री स्थानीय शासनका ५१ सूचकहरूमध्ये हालसम्म ७०–७९ प्रतिशतसम्म सूचकहरू पूरा भइसकेकोले वडालाई ‘बालमैत्री उन्मुख वडा’ घोषणा गरिएको छ। बाँकी सूचकहरू पनि निर्धारित समयभित्र पूरा गरी २०८२ माघभित्र पूर्ण रूपमा बालमैत्री वडा घोषणा गरिने लक्ष्य रहेको अध्यक्ष आलेले जानकारी दिनुभयो।
यस अभियानमा दुधौली नगरपालिका, ह्याण्ड्स नेपाल सिन्धुली, तथा प्लान इन्टरनेशनल नेपालको आर्थिक तथा प्राविधिक सहयोग रहेको छ। स्थानीय तहमा बालबालिकाको अधिकार सुनिश्चित गर्न र बालमैत्री शासन प्रणाली प्रवर्द्धन गर्नका लागि विगत दुई वर्षदेखि यो अभियान सञ्चालनमा रहेको हो।
