दुधौली बालिका बलात्कार प्रकरणमा निस्पक्ष छानविनको माग

दुधौली एफ.एम. सम्वाददाता
दुधौली, सिन्धुली १५ बैसाख — नेपाल कम्युनिस्ट पार्टी (एमाले) दुधौली नगर कमिटीले दुधौली नगरपालिका क्षेत्रभित्र हालै सार्वजनिक भएको बालिका बलात्कार प्रकरणप्रति गम्भीर ध्यानाकर्षण जनाएको छ । आज एक प्रेस विज्ञप्ति जारी गर्दै पार्टीले घटनाको निस्पक्ष छानविन सहित दोषीलाई कडा कानुनी कारबाही गर्न र पीडितलाई न्याय दिलाउन माग गरेको छ।
पार्टीले महिला अधिकार तथा मानव अधिकारको सम्मानमा सदैव प्रतिबद्ध रहेको उल्लेख गर्दै, सुशासन, सामाजिक न्याय र जवाफदेहितासहित स्थानीय सरकार संचालनमा विश्वास रहेको जनाएको छ ।
विज्ञप्तिमा अपराधको सत्यतथ्य छानबिन गरी दोषीलाई कानुनी दायरामा ल्याउन र निर्दोष व्यक्तिलाई फसाउने कार्य नहोस् भनी विशेष ध्यान दिन आग्रह गरिएको छ । साथै, सत्य र निष्पक्ष न्यायिक निरुपणका लागि दुधौली नगरवासी सम्पूर्णमा निरन्तर खबरदारी गर्न पनि पार्टीले अपिल गरेको छ ।
प्रेस विज्ञप्तिमा सचिव चन्द्र बहादुर कार्की (रमेश) र अध्यक्ष क्षेत्रराज अधिकारीको हस्ताक्षर रहेको छ।