नागरिकका चासो र प्रश्नको प्रत्यक्ष जवाफमा स्थानीय तह सक्रिय
प्रतिमा दियाली
सिन्धुली — फिक्कल गाउँपालिका–६ रत्नावतीमा आयोजित सार्वजनिक सुनुवाई कार्यक्रम सफलतापूर्वक सम्पन्न भएको छ। वडाध्यक्ष कुलेन्द्र बहादुर मगरको अध्यक्षतामा सम्पन्न कार्यक्रममा स्थानीय नागरिक, जनप्रतिनिधि, कर्मचारी तथा सरोकारवालाबीच वस्तु तथा सेवाको गुणस्तर, सेवा प्रवाह र योजना कार्यान्वयनबारे प्रत्यक्ष सवाल–जवाफ भएको हो।
आर्थिक वर्ष २०८१/८२ को दोस्रो चौमासिक अवधिमा वडा र गाउँपालिकाबाट प्रवाह भएका सेवाहरूका सम्बन्धमा सहभागीहरूले पाईप वितरण, सडक निर्माण, स्वास्थ्य, शिक्षा र कृषि लगायतका विषयमा प्रश्न उठाएका थिए। नागरिकहरूले पाइप वितरणमा पारदर्शिता नदेखिएको र सेवामा पहुँच नपुगेको गुनासो राखेका थिए।
प्रश्नको जवाफ दिंदै वडाध्यक्ष मगरले पाइप मागअनुसार वितरण गरिएको र सडक विस्तारका लागि छुट्याइएको बजेट अनुसार काम भइरहेको जानकारी दिए। त्यस्तै, उनले भौगोलिक विकटताका कारण केही स्थानमा सेवा पुग्न कठिन भएपनि आगामी दिनमा ती क्षेत्रहरूमा विशेष प्राथमिकताका साथ कार्यक्रम पुर्याइने बताए।
स्वास्थ्य तथा शिक्षाका विषयमा उठेका प्रश्नहरूको जवाफ सम्बन्धित शाखाका प्रमुखहरूले दिएका थिए। वडाका सचिव मोहन सुनुवारले चालु आर्थिक वर्षका लागि विनियोजित बजेट, योजना, सेवा प्रवाह र राजस्व संकलनका अवस्थाबारे विस्तृत जानकारी प्रस्तुत गरे।
कार्यक्रममा पूर्व गाउँपालिका अध्यक्ष धन बहादुर कार्की, कार्यपालिका सदस्यहरू, नेकपा (एमाले) गाउँपालिका अध्यक्ष, नेकपा (एमाले) वडा नं. ६ अध्यक्ष रोशन कुमार भण्डारी, नेपाली कांग्रेस वडा नं. ६ सभापति चन्द्र बहादुर पाख्रिन, नेकपा (माओवादी केन्द्र) गाउँपालिका सचिव देवेन्द्र कुमार पाख्रिन लगायत विभिन्न संघसंस्था र राजनीतिक दलका प्रतिनिधि तथा सर्वसाधारण नागरिकको उल्लेखनीय उपस्थिति रहेको थियो।
सार्वजनिक सुनुवाई कार्यक्रमले जनताको आवाज सुन्ने र उत्तरदायिता सुनिश्चित गर्ने लोकतान्त्रिक अभ्यासमा योगदान पुर्याएको सहभागीहरूले बताएका छन्।
