दुधौली, सिन्धुली
२०७९ वैशाख २९
दुधौली एफ.एम. सम्वाददाता
दुधौली / २५६९औँ बुद्ध जयन्ती तथा उभौली पर्वको विशेष अवसरमा बागमती प्रदेश प्रहरी तालिम केन्द्र, दुधौली सिन्धुलीमा एक विशेष कार्यक्रमका साथ वक्तृत्वकला प्रतियोगिता सम्पन्न भएको छ। कार्यक्रमको प्रमुख आतिथ्य प्रदेश प्रहरी तालिम केन्द्रका समादेशक प्रहरी वरिष्ठ उपरीक्षक श्री प्रवीण पोखरेलज्यू रहनुभएको थियो।
कार्यक्रममा केन्द्रका सह-समादेशक तथा तालिम संयोजक प्रहरी नायव उपरीक्षक श्री दिपेन्द्र पंजियार थारु सहित केन्द्रमा कार्यरत सिनियर तथा जुनियर प्रहरी अधिकृतहरु, उन्नत तालिममा संलग्न प्रशिक्षार्थीहरु तथा बाह्य प्रशिक्षक वर्गको समेत उल्लेखनीय उपस्थिति रहेको थियो।
वक्तृत्वकला प्रतियोगितामा प्रहरी जवान आधारभूत तालिम (६-२०४) समूहका प्रशिक्षार्थीहरुले बुद्धको जीवन दर्शन, अहिंसा, करुणा तथा सामाजिक सद्भाव विषयमा मन्तव्य प्रस्तुत गरेका थिए। प्रतियोगिताबाट उत्कृष्ट तीन प्रशिक्षार्थीलाई क्रमशः प्रथम, द्वितीय र तृतीय पुरस्कार प्रदान गरिएको थियो।
कार्यक्रमले प्रशिक्षार्थीहरूमाझ अभिव्यक्तिको कला, आत्मविश्वास तथा नेतृत्व क्षमताको विकासमा योगदान पुर्याउने विश्वास व्यक्त गरिएको छ। साथै, बौद्ध दर्शन र संस्कृतिको महत्वसमेत उजागर गरिएको थियो।
