दुधौली एफ.एम. सम्वाददाता
दुधौली/
सामाजिक रूपान्तरणका लागि नाटकलाई सशक्त माध्यम बनाउँदै कला घर सिन्धुली कला घरले आयोजना गरेको जनचेतनामूलक नाटक ‘कचहरी’ आज दुधौली बजारमा सफलतापूर्वक सम्पन्न भएको छ । दुधौलीको पुरानो हाटबजार बिहिबारे बजारको समय पारेर गरिएको कार्यक्रममा सिन्धुली कला घरका कलाकारहरूका साथै स्थानीय बुद्धिजीवी जनप्रतिनिधि, शिक्षक विद्यार्थीहरूको उल्लेख्य सहभागिता रहेको थियो । कार्यक्रम मेरी स्टोप्स इन्टरनेशनल, सुनौलो परिवार नेपाल र OCMC को सहयोग तथा सिन्धुली कला घरको आयोजनामा सम्पन्न भएको हो ।
नाटकमार्फत लैङ्गिक विभेद, सुरक्षित गर्भपतन, परिवार नियोजन, यौन तथा प्रजनन स्वास्थ्य र सम्बन्ध विच्छेद जस्ता संवेदनशील विषयलाई प्रस्तुत गरिएको थियो । ‘कचहरी’ नाटकले यस्ता सामाजिक समस्याहरूलाई दृश्यात्मक रूपमा प्रस्तुत गर्दै उपस्थित दर्शकसँग प्रत्यक्ष संवादमार्फत समाधानको खोजी गरेको सिन्धुली कला घरका संरक्षक तथा मुख्य अभियानता नेपाली बाबु सुमनलले बताउनु भयो
नाटकको परिकल्पना संरक्षक तथा अध्यक्ष नेपाली बाबु सुमनले गरेका हुन् भने कला घर सिन्धुलीका कलाकारहरू—रिता थिङ, सिर्जना गोले, निरुता लामा, जीवन थापा मगर, रिता बिक, रुबिना पुलामी, करुणा नेपाली, विकास पहेली, विशाल सङ्कर, कलम श्रेष्ठ, ममता श्रेष्ठ लगायतले जीवन्त अभिनय प्रस्तुत गर्नु भएको थियो । कार्यक्रमको सहजीकरण मेरी स्टोप्स सिन्धुलीका कार्यक्रम अधिकृत धन पुलामी मगरले गर्नुभएको थियो ।
सिन्धुलीको दुधौली नगरपालिकाबाट सुरु भएको यो नाटकको आगामी दिनहरूमा जिल्लाको सबै ९ वटै स्थानीय तहमा प्रदर्शन गरिने आयोजकले जनाएको छ । आगामी समयमा हुने अन्य स्थानहरूमा गोलन्जोर गाउँपालिकामा यही जेठ १६ गते, कमलामाई नगरपालिका सिन्धुली माडीमा १७ गते, मरिण गाउँपालिका १८ गते र घाङ्लेखमा गाउँपालिकामा १९ गते कचहरी नाटक मञ्चन गरिने कार्यक्रम रहेको छ ।
सामाजिक विषयमा चेतना फैलाउने यस्ता प्रयासले समुदायमा सकारात्मक प्रभाव पार्ने स्थानीय दर्शकहरूले विश्वास लिइएको छ ।
