दुधौली एफ.एम सम्वाददाता
दुधौली/ नमुना माध्यमिक विद्यालय लदाभिर ले काजु खेतीमा सफलता हासिल गरेपछि अब ड्रागन फ्रुट खेतीतर्फ कदम बढाएको छ। विद्यालयले १२० वटा ड्रागन फ्रुटका बिरुवा रोपेर औपचारिक रूपमा खेतीको सुरुवात गरेको हो।
दुधौली नगरपालिका–९ मा रहेको उक्त विद्यालयले कृषि धार अन्तर्गत अध्ययनरत विद्यार्थीहरूलाई व्यवहारिक शिक्षासँग जोड्दै स्थानीय उत्पादनसँगै आयातित बहुमूल्य फलफूलको उत्पादनमा जोड दिएको छ। कक्षा कोठाभित्र सीमित नभई खेतबारीमै प्रयोगात्मक अभ्यास गराउँदै आएको विद्यालयले यसअघि काजु खेतीमा उल्लेखनीय सफलता हात पारेको थियो।
सामान्यतया विश्वविद्यालय तहमा अनुसन्धान गरिने विषयलाई विद्यालय तहबाटै अभ्यासमा उतार्दै नमुना मावि लदाभिरले काजु उत्पादनमा सफलता हासिल गरेको थियो। भारतका विभिन्न स्थानमा व्यावसायिक रूपमा उत्पादन हुँदै आएको काजु खेतीलाई दुधौलीको माटोमा परीक्षण गरी सफल भएपछि विद्यालयले अब ड्रागन फ्रुट खेती सुरु गरेको हो।
विद्यालयका प्रधानाध्यापक मोहन शाही ठकुरीका अनुसार शिक्षक र विद्यार्थीको संयुक्त सहभागितामा ड्रागन फ्रुटका बिरुवा रोपिएको हो। “कृषि धारका विद्यार्थीलाई व्यवहारिक र आयमुखी शिक्षा दिनु हाम्रो उद्देश्य हो,” उनले बताए।
विद्यालयले उत्पादनमुखी शिक्षालाई प्राथमिकता दिँदै कृषिमार्फत आत्मनिर्भरता र उद्यमशीलता विकास गर्ने लक्ष्य लिएको जनाएको छ।
नमुना मावि लदाभिरले काजु खेतीको सफल अभ्यासपछि ड्रागन फ्रुट खेती सुरु गर्नु विद्यालय तहबाटै व्यावसायिक र अनुसन्धानमुखी कृषि शिक्षाको उत्कृष्ट उदाहरण बनेको छ। यस पहलले विद्यार्थीहरूमा सीप, आत्मविश्वास र उद्यमशीलता विकास गराउँदै स्थानीय स्तरमै आयआर्जनका सम्भावना विस्तार गर्ने अपेक्षा गरिएको छ।
