दुधौली एफएम सम्बाददाता
दुधौली/ सिन्धुलीको दुधौली नगरपालिका–१२ मा निर्माणाधीन जिनाखु खोला–ठाकुर खोला पक्की पुलमा ढिलाइ हुनुका साथै कमसल सामग्री प्रयोग गरिएको भन्दै स्थानीय वासीले गम्भीर गुनासो गरेका छन्। वर्षौंदेखि प्रतीक्षाको रूपमा रहेको पुल निर्माणमा ठेकेदार र सम्बन्धित इन्जिनियरको लापरबाही भएको स्थानीयको आरोप छ।
दुधौली नगरपालिका–१२ मा निर्माणाधीन जिनाखु खोला–ठाकुर खोला पक्की पुलको काम समयमै सम्पन्न नहुँदा स्थानीयवासी आक्रोशित बनेका छन्। स्थानीयका अनुसार निर्माणाधीन पुलका दुईवटा पिल्लर मध्ये एउटा सिधा र अर्को हेर्दै बाङ्गिएको देखिन्छ। साथै पुलमा प्रयोग गरिएको रडसमेत हातले हल्लाउँदा हल्लिने अवस्थामा रहेको उनीहरूको गुनासो छ।
स्थानीयले पुल जस्तो संवेदनशील संरचनामा यसरी लापरबाही हुनु भविष्यमा ठूलो दुर्घटनाको कारण बन्न सक्ने चेतावनी दिएका छन्। “यो पुल हाम्रो वर्षौंदेखिको सपना हो, तर गुणस्तरहीन कामले त्यो सपना नै जोखिममा परेको छ,” एक स्थानीयले भने।
दुधौली नगरपालिकाको नगरकार्यपालिकाको कार्यालय अन्तर्गत सञ्चालनमा रहेको उक्त योजनाको नाम निनाखु खोता–ठाकुर खोला पक्की पुल (DPR सहित) हो। योजना दुधौली नगरपालिका–१२, सिन्धुलीमा निर्माण भइरहेको छ।
पुल निर्माणका लागि ठेक्का नं. 09/NCB/WORKS/DMUN/2080/081 अनुसार रु. ९०,९४,९३१.९६ (भ्याट र पी.एस. समेत) को लागतमा ठेक्का सम्झौता भएको छ। ठेक्का सम्झौता मिति २०८०/१०/०२ मा भएको र निर्माण कार्य २०८१ /२ / ३२ भित्र सम्पन्न गर्नुपर्ने उल्लेख छ।
उक्त पुल निर्माणको जिम्मा के.एल.के.एन. निर्माण सेवा प्रा. लि., कमलामाई नगरपालिका–५, सिन्धुली ले पाएको छ। तर तोकिएको समय नाघिसक्दा पनि काम अपेक्षित रूपमा अघि नबढेको र गुणस्तरमा समेत प्रश्न उठेको स्थानीयको भनाइ छ। पुलको पिल्लर बाङ्गो र कमसल भएको भन्दै स्थानियहरुले बिरोध गरे पछि निर्माण कम्पनीले पिल्लर फुटाउन सुरु गरिुएको छ ।
स्थानीयवासीले नगरपालिकाले तत्काल अनुगमन गरी गुणस्तरीय सामग्री प्रयोग गराउन, निर्माण कार्य तीव्र बनाउन र दोषीमाथि आवश्यक कारबाही गर्न माग गरेका छन्। समयमै ध्यान नदिइए आन्दोलनमा उत्रिन बाध्य हुने चेतावनीसमेत उनीहरूले दिएका छन्।
