इलाका प्रहरी प्रमुख धितालको प्रभाव: दुधौलीमा शान्ति सुरक्षाको नयाँ अध्याय

दुधौली एफ.एम. सम्वाददाता

दुधौली / सिन्धुलीको दुधौलीमा इलाका प्रहरी प्रमुखका रूपमा निरीक्षक सिमोन धितालको आगमनपछि शान्ति सुरक्षामा उल्लेखनीय सुधार देखिएको छ। उनको नेतृत्वमा सञ्चालन भएका अपरेशनहरूले आपराधिक गतिविधिहरूलाई नियन्त्रणमा ल्याउन सफल भएका छन्। यसले गर्दा दुधौली मात्र नभई समग्र जिल्लामा समेत उनको प्रशंसा भइरहेको छ।

धितालको निष्पक्ष, निडर र कर्मठ नेतृत्वका कारण प्रहरी संगठनभित्र उत्साहको माहोल छ भने स्थानीय बासिन्दाहरूले पनि सुरक्षाको अनुभव राम्रोसँग गरिरहेका छन्। विगतमा कमजोर देखिएको सुरक्षा अवस्था अहिले बलियो बनेको छ।

सफल अपरेशन र सुधार

धितालको नेतृत्वमा इलाका प्रहरी कार्यालय डकाहा, दुधौलीले विभिन्न अपरेशनहरू सञ्चालन गरेको छ। तिनीहरूमध्ये प्रमुख रूपमा:

• बन तस्करहरूको गिरोह निस्तेज पार्न सफल
• काठ तस्कर, चोरी सिकारी जस्ता आपराधिक गतिविधिहरूमा कठोर कारबाही
• लागुऔषध कारोबारमा नियन्त्रण
• सवारी दुर्घटनामा कमी

स्थानीय बासिन्दाहरू, बुद्धिजीवीहरू र व्यवसायीहरूले प्रहरी निरीक्षक धितालको कार्यशैलीको खुलेर प्रशंसा गरिरहेका छन्। सामाजिक सञ्जालमा ‘Keep going, Inspector Saab. We are with you.’ जस्ता समर्थनका सन्देशहरू व्यापक रूपमा फैलिरहेका छन्।

समयअगावै सरुवाको चिन्ता

धितालले गरेको उल्लेखनीय सुधारलाई देखेर स्थानीयहरू उत्साहित छन्। तर, उनको समयभन्दा अघि नै सरुवा गर्ने प्रयास भइरहेको खबरले स्थानीयवासीलाई चिन्तित बनाएको छ। यदि कुनै शक्ति केन्द्रले धिताललाई स्थानान्तरण गर्ने प्रयास गरेमा, यसले दुधौलीको सुरक्षामा असर पार्ने भन्दै सर्वसाधारणले आपत्ति जनाएका छन्।

स्थानीय जनताले निष्पक्ष र प्रभावकारी सुरक्षाका लागि प्रहरी निरीक्षक धिताललाई निरन्तरता दिनुपर्ने माग राख्दै सम्बन्धित निकायलाई ध्यानाकर्षण गराएका छन्।