दुधौली एफएम सम्बाददाता
दुधौली, सिन्धुली — असोज २७, २०८२ (अक्टोबर १३, २०२५)
दुधौली/ सिन्धुलीको दुधौली नगरपालिका–५ सिर्थौलीमा अवस्थित दुधौली नगर अस्पतालले सेवाग्राहीका लागि आवश्यक अक्सिजन सिलिन्डर र अक्सिजन कन्सन्ट्रेटर भाडामा उपलब्ध गराउने भएको छ । अस्पतालले सेवा क्षेत्रमा रहेका बिरामी र सेवाग्राहीको सहजताका लागि यस्तो व्यवस्था गरेको हो।
अस्पतालका अनुसार, अक्सिजन सिलिन्डरका लागि धरौटी रु. ५,००० र प्रति सिलिन्डर भाडा रु. १,५०० तोकिएको छ। त्यस्तै, अक्सिजन कन्सन्ट्रेटरका लागि धरौटी रु. १०,००० र दैनिक भाडा रु. १५० तोकिएको छ। सेवाग्राहीले निवेदनसहित आवश्यक कागजात र रकम बुझाएपछि उपकरण उपलब्ध गराइने अस्पतालले जनाएको छ । अस्पतालले एक सूचना जारी गर्दै उक्त सेवा प्रदान गरिने जनाएको हो ।
अस्पतालले जारी गरेको सूचनामा, सेवाग्राहीले उपकरण लिने र बुझाउने दुबै समयमा चेकजाँच गर्नुपर्ने, उपकरणमा क्षति पुगेमा त्यसको जिम्मेवारी सेवाग्राहीकै हुने र अस्पतालले आवश्यकता अनुसार फिर्ता माग गर्न सक्ने उल्लेख गरेको छ ।
सेवाग्राहीले प्रयोग अवधि थप गर्न चाहेमा अक्सिजन कन्सन्ट्रेटरको हकमा प्रत्येक ३ महिनामा र अक्सिजन सिलिन्डरको हकमा रिफिल गर्ने क्रममा निवेदन दिएर समय थप गर्न सक्ने व्यवस्था गरिएको छ ।
सेवा लिनको आवश्यक आवश्यक कागजातहरूमा नागरिकताको प्रमाणपत्र, अग्रिम भाडा तथा धरौटी रकम बुझाएको रसिद र सम्बन्धित बिरामीको पुर्जा (रोगको प्रकृति निर्धारणका लागि)आवश्यक रहेको अस्पतालका प्रमुख डा. सुमन सिंह कार्कीले जनाउनु भएको छ ।
दुधौली नगर अस्पतालका प्रमुख डा.कार्कीका अनुसार, “यो व्यवस्था विशेषगरी आपत्कालीन अवस्थामा अक्सिजन अभाव नहोस् भन्ने उद्देश्यले गरिएको हो । सेवाग्राहीहरूले सहजै अस्पताल प्रशासन शाखामार्फत आवेदन दिन सक्नेछन्,” भनेर जानकारी दिनुभयो ।
अधिक जानकारीका लागि सम्पर्क दुधौली नगर अस्पताल, सिर्थौलीमा सम्पर्क गर्न सकिने पनि अस्पतालले जनाएको छ ।
