दुधौली एफ.एम. सम्बाददाता
सिन्धुली/ सुनकोशी गाउँपालिका, रामटार, सिन्धुलीका प्रमुख प्रशासकीय अधिकृत अर्जुन दर्जीको कार्यकक्षमा भएको तालाबन्दीप्रति जिल्लाका सम्पूर्ण प्रमुख प्रशासकीय अधिकृतहरुको गम्भीर ध्यानाकर्षण भएको छ।
सिन्धुली जिल्लामा कार्यरत प्रमुख प्रशासकीय अधिकृतहरूको तर्फबाट जारी गरिएको संयुक्त प्रेस विज्ञप्तिमा प्रचलित कानुन र तोकिएको प्रक्रिया विपरीत स्वार्थ समूहहरूले नियोजित रूपमा कार्यकक्षमा तालाबन्दी गरी अनैतिक दबाब सिर्जना गरेको भन्दै गम्भीर आपत्ति जनाइएको छ । विज्ञप्तिमा यस्तो कार्यलाई अत्यन्तै निन्दनीय भन्दै तत्काल अन्त्य गर्न माग गरिएको छ ।
विज्ञप्तिमा भनिएको छ, “वार्षिक बजेट तथा कार्यक्रम कार्यान्वयनको अन्तिम समयमा यस्ता गतिविधिहरू हुँदा समग्र पालिकाको सेवा प्रवाह, विकास निर्माण कार्य र नियमित भुक्तानी कार्य प्रभावित हुने मात्र होइन, सेवाग्राहीहरूको अधिकारमै गम्भीर असर पर्छ।”
यस्ता घटनाबाट प्रमुख प्रशासकीय अधिकृत र अन्य कर्मचारीहरूको काम गर्ने मनोबल घट्न सक्ने उल्लेख गर्दै, प्रमुख प्रशासकीय अधिकृतहरूले सम्बन्धित सबै सरोकारवालाहरुलाई यस्ता नकारात्मक गतिविधिबाट सचेत रहन आग्रह गरेका छन् ।
साथै, वार्तामार्फत समस्या समाधान खोज्न र प्रचलित कानुन तथा प्रक्रियाको पालना गर्दै प्रमुख प्रशासकीय अधिकृत अर्जुन दर्जीको कार्यकक्षको तालाबन्दी तत्काल खोल्न माग गरिएको छ ।
प्रमुख प्रशासकीय अधिकृतहरूले आफुहरू कानुनी जिम्मेवारी र अधिकार अन्तर्गत सेवा प्रवाह र विकास निर्माण कार्यमा सधैँ प्रतिबद्ध रहेको स्पष्ट पार्दै सबै जनप्रतिनिधि, शिक्षक, राजनीतिक दल, पत्रकार, नागरिक समाज तथा प्रशासनिक संयन्त्रहरूलाई सहयोग गर्न अपिल गरेका छन् ।
