– दुधौली एफ.एम. संवाददाता, सिन्धुली
दुधौली नगरपालिका–६ मा चालु आर्थिक वर्ष २०८१/०८२ अन्तर्गतको बालबालिका लक्षित कार्यक्रम भव्य रूपमा सम्पन्न भएको छ। नगरपालिका स्तरबाट वार्षिक नीति तथा कार्यक्रममार्फत विनियोजित बजेट अन्तर्गत बालबालिकाका सिर्जनात्मक क्षमता अभिवृद्धि गर्ने उद्देश्यले यो कार्यक्रम आयोजना गरिएको हो।
वडा अध्यक्ष कमानसिङ आले मगरको विशेष पहल र स्थानीय अभिभावकहरूको सक्रिय सहभागितामा विभिन्न टोल र विद्यालयमा बाल क्लब पुनर्गठन, हाजिरी जबाफ, चित्रकला, र नृत्य प्रतियोगिताजस्ता गतिविधिहरू सम्पन्न भए।
कार्यक्रम बाल क्लब सञ्जालकी अध्यक्ष श्रीमती निर्मला कुमार दनुवारको अध्यक्षतामा र प्रमुख प्रशासकीय अधिकृत श्री दिनेशराज पन्तको प्रमुख आतिथ्यतामा सम्पन्न भएको थियो।
कार्यक्रममा वडा नं. २ का अध्यक्ष रितेश राउत, वडा नं. ४ का अध्यक्ष रितेश बि.क., वडा नं. ६ का वडा सदस्यहरू, शिक्षक–शिक्षिका तथा स्थानीय अभिभावकहरूको उल्लेखनीय उपस्थिति रहेको थियो।
प्रतियोगितामा उत्कृष्ट प्रदर्शन गर्ने बालबालिकालाई प्रथम, द्वितीय, तृतीय र चौथो स्थान अनुसार पुरस्कार वितरण गरिएको थियो। आयोजकहरूका अनुसार यस्ता गतिविधिले बालबालिकाको सिर्जनात्मकता, आत्मविश्वास र सामाजिक सहभागिता अभिवृद्धिमा टेवा पुर्याएको छ।
कार्यक्रमलाई सम्बोधन गर्दै प्रमुख अतिथि पन्तले दुधौलीका सबै वडाहरूमा यस्तै प्रकारका कार्यक्रम सञ्चालन गरी बालबालिकाको प्रतिभा उजागर गर्नुपर्ने आवश्यकता औंल्याउनु भयो।
वडा नं. ६ ले विगतदेखि नै महिला, बालबालिका तथा अपाङ्गता भएका लक्षित समूहहरूलाई ध्यानमा राखी विभिन्न रचनात्मक कार्यक्रमहरू सञ्चालन गर्दै आएको छ।
कार्यक्रमको सफल आयोजनामा प्रत्यक्ष तथा अप्रत्यक्ष रूपमा सहयोग पुर्याउने सम्पूर्ण सहयोगीहरूलाई आयोजक टोलिबाट हार्दिक धन्यवाद तथा बधाई व्यक्त गरिएको छ।
